Ka sorkar Assam ynne ka sngi da pynkylla noh ya ki kyndon yada na u COVID-19 hadien wa da hiar kiwa yoh ya uni u khñiang khlam heiwa kiwa boon ki District da em ki hapoh 10 ngut kiwa dang yoh la 2-3 tayaw wei kiwa da dep yoh tika chisien da em ki 95% katwa kiwa da yoh la arsien da em ki 77%.
Kamtæ nadooh 5:00 waje i step ka 15 tarik uni u bnai ki hukum wa da pynmih chwa man ki kiwa da pyndam lait noh i deiñ Mask, i yajngai uwi ya uwi wa i pynemkaam ya ki dawai saitkti dei langær ha waroh ki thaw paidbah.
Ki District Magistrate wa ki Superintendent of Police toh u booh bru ki yow pyntikna wa myllien ki bru wow leh ya iwa yada nei poor u khñiang khlam.
Ki bru wym pu em yoh tika ym chah ya ki ha ki thaw paidbah lait noh ki Hospital. Hap leh wow pynyoo ya iwa da dep yoh tika wei ki tre ki dukan wa kiwi ki thaw hap ki wow pyntikna yeini kamjooh leh ha ki thaw ki yong ka sorkar wei lada ym leh yeini daw chah deiñ kuna.
Hap leh wow pynbiang ya ki dawai saitkti lane ki thaw saitkti ha ki thaw paidbah wa ki dukan.
Ka kuna ya ki wym deiñ Mask wa kiwa mynthu ha ki thaw paidbah toh T. 1000.
Da pyndam leh yei Test COVID-19 ha ki Airport, Railway Station, ki thaw psiah cha ka jylla wa ki Hospital tangwa kitu kiwa em ki dak ki chin wa chitom yei wow phah Test dei mon yong ki.
Da pyndam leh ya ki Night Curfew.
