Hadien wa em sa uwi u bru wa ar wa yoh ya u khniang Novel Coronavirus hapoh ka ri ha ka jylla Kerala, uwa katni dang em hei sumaar. Ka Health Ministry da pyntip ko wa man uwa dang yow yei sumaar wei dang paitbniah yei long i man u wei uni u bru toh uwa wan wa lai cha China da boonsien.
Ka montri ka chait ka khiah ka Kerala ka K.K. Shailaja da ong ko wa ka jylla Kerala man ko kawa da pynkhreh yow yaleh ya kani ka kaam wei ki paidbah ym toh u syier mynsien ki neibhah ye u pynchait ya kiwa yoh ya uni u khniang.
Neiliang ka Indian Embassy deiwa yaklam waka Beijing da pyntip ki wa kiwa wan cha India na China da ki E-Visa da pyndam noh ya ki chipor chisyndon.
Ini toh ya waroh ki nong China wa ksoh yaki Chinese Passports wa kiwi wa yaleh E-Visa kiwa na kiwi ki ri kiwa sah ha People’s Republic of China leh da pyndam wow e ya ki E-Visa.
Kiwa em chwa namo kiwa da yoh E-Visa da pyntip leh wa ym krehkaam de ki.
Ya kitu won kiwa emkaam wow wan cha India ye ki wow lai cha ka Embassy ka India wa em ha Beijing lane cha ki Indian Consulate wa em ha Shanghai wa Guangzhou, kamjooh kiwi ki Indian Visa Application Centers wa em ha kini ki sor.
Ka USA leh da khang ko 14 sngi ya waroh kiwa wan na China hanlada man ki na kiwon kiwon ki ri wei ki tre ri won wa wan na Hube Province, China hap ki wow neh 14 sngi hapoh Quarantine.
Ka Singapore leh da pyndam ko wow e Visa cha ki nong China katwa ka Vietnam da pyndam ko yaka Tourist Visa.
Ka Russia leh da pynbna ko wa da pyndam wow chah u psiah ki nong China kawa jooh chah ko deiwa e mynkna ya ki Visa kamjooh wow e yaki Work Visa. Ya kam ini i jooh da leh daka Philippines, Bangladesh, Sri Lanka, Malaysia waka Mozambique ka ri wa em ha Africa.
Discussion about this post