Ka Joint Action Committee kawa kynthup ya ka FKJGP, KSU, Synjuk Waheh Chnong Namdong Area da pyndam noh ki yei rai chong kyllaiñ myngngor hakhmat ka Namdong PHC kawa da pynbait wow leh ynne ka sngi nadooh i por 11 waje i step hadooh 3:00 waje i sngi.
Ha chwa i thmu wow chong kyllaiñ myngngor, u Dr. T. Suchiang In-charge kani ka PHC da yachem u yaka JAC heiwa da pyntip u wa neiliang ka yung krehkaam u DMHO da phah u ya ki arngut ki Nurse neibynta ka PHC kiwa da wan kreh ynne ka sngi.
Hajrong ini, ka JAC da rai ko wow sangeh chwa wow chong kyllaiñ myngngor neidaw wa u DMHO da pyrchang u wow pynbiang ya iwa duna wei ka JAC da kyntu ko leh ya u Doctor wow kyntu lang ya kiwi ki wakreh kani ka PHC wow wankreh tista ki neibynta i bha i miat ki paidbah kam hei wow leh ya ki Birth wa Death Certificate, kiwa e dawai Pharmacy kiwa wan kreh du le sien chi tayaw iwa ktah ya ki paidbah neibhah teiñ teiñ ki paidbah wa wan ym chem ki ya ki wakreh, kamtæ u e dawai du le sien chi tayaw ym man ko iwa bha ya ki 31,000 tam ki paidbah wa pait kani ka PHC.
Kamtæ da kyrpaad ya u Doctor wow kyntu u ya ki wakreh wow wan kreh ka man-ka-sngi neibhah wa em ki por wa em du uwi u wakreh tangwa yaka tulop won kynmoo ki wow chim waroh chi bnai han lada ym wankreh tista ki leh wei ka JAC daw booddien ko neibynta ini yow myntoi ki paidbah.
Ya kiwi won ki dawa kiwa dang sah, ka JAC daw bood ko wow dawa pynmankaam smat neibynta i myntoi u paidbah, wei ka JAC da dawa ko leh wow pynneh ya ki Nurse kiwa na kani ka thaaiñ kiwa kreh ha kani ka PHC wei ym toh wow kyrriah ki neibhah wa ki rap ye ki wow chakri khambha ya ki paidbah.
