Ka Executive Committee ka Seng Kur Warjri ha uni u snem da pyndam ko yaka dorbar ka seiñkur wa chisien chi snem kawa da thmu wow pynman ha chnong Sohryngkham neidaw wa booh yaki kyndon wow yada naka khlam COVID-19.
Kamtæ neiliang ka seiñkur da rai noh ko wow yarap yaka para kur kawa da maad yei eh neiwa em kani ka khlam deiwa e yarap ya kawa da heh rta ka Thaneh Warjri kawa na chnong Kyrdemkulai.
Ha ki phaw snem nachwa da lai sah noh ko cha Kyrdemkulai neibynta i khih i khan deilang wa ki khon ko. Hadien wa ki khon ko da bia da lai sah ki cha kiwi i thaw katkam wa yah i kreh ki, da man long i khmat tidiang ko wei da pait da sumaar yaka da ka khon khian dooh ka yong ka hadooh wa thlah ko.
Nalor ini, i wan ka khlam da ban ko leh najrong i chem chitom ka yung ko hadien wa khlaad ki arnut, ka khon khaddooh ko wa u kurim yong ka heipor wa em kani ka khlaam wei da ieh ki chadien ya le ngut ki khon. Heiwa kawa heh dooh toh ka Aidalin Warjri kawa 17 snem kawa da hap wow kit ya ka lyngkor wow psa ya ka beipun ko kamjooh ki ar ngut ki diah chynrang deiwa lai mylla cha ki chnong wa em chajan.
Nalor ini waroh i yung wa sah ki leh toh iwa da sih iwa ym yohlaad ki wow pynchna iwa da e thaw ya ki wow sah ha i thaw ka Meghalaya Electricity Corporation Limited.
Ini i chem chitom da poi ko cha i tip ki rangbah ka kur Warjri ha nongbah Shillong. Kamtæ da hiar ki cha ka chnong Kyrdemkulai yow lai pait yei man na Thaneh Warjri wei da chem ki ya ini i sakhiat wei da pynkhreh ya ki laad yarap. Heiwa da yarap da ki mar baam, ki sula wa ka poisa wa da e sñiawbha da ki waheh ka kur deilang waka India Every Home Crusade.
Ka Seng Kur Warjri leh da mang poisa ko wow yarap chna ya i yung yonh ki iwa da jæd.
