Hadien wa pynbna ka sorkar wa ya i dor Petrol wa Diesel da pynhiar noh da T. 5, ynne ka sngi neiliang ka Meghalaya Joint Action Committee of Commercial Vehicles da rai ko wow sangeh chwa ya i yakhih heiwa nadooh mynstep ka sngi waroh ki kari kamai daw sdang biang ki wow mih kamai kamwa jooh man.
U Wandonbok Jyrwa, uwa man u Chairman ka JAC da ong u wa i dor yong ka bai kari u man ko kamwa da pynbna da ka sorkar, deiwa maham leh ya kiwa chim tam wa lada yoh yutip daw ujor pyrchah yow chah pyndooh chipor yaka Permit.
Hawa yatoh wa i chah pynngat kyndon aiñ kiwa yahkhmat ka JAC neidaw ka yakhih, u Jyrwa da ong u wa ha ka yakhih ym em tympra lane næ muchlia ya ki kaam kiwa ktah ya ki paidbah ha ka chong suk, chong chngaaiñ, heiwa ka yakhih man ko kawa jai jai.
Da ong u wa lada ki dkhot ka JAC dang chah pynthut sah ki ha ki bor ka aiñ neidaw ka yakhih, neiliang ka kynhun ym yohsa wow lai biang cha ki paidbah neibynta wow paan ya i rai.
