Pyndam ka Rajasthan ya 9 tylli ki District thymme wa chna da ka sorkar warim

Ka sorkar ka jylla Rajasthan, ynne da rai ko wow pynbait wei pyndam noh ya ki District wa ki Division thymme wa da chna da ka sorkar warim wei kattu daw em noh waroh 7 tylli ki Division wa 41 tylli ki District.

Katkam wa pynlait khubor da u Montri sorkar, u Jogaram Patel, ka sorkar warim ha u snem khaddooh ko da chna ko 17 tylli ki District thymme deilang wa 3 tylli ki Division wa thymme iwa da pynbna da ka Revenue Department ha ka 05-08-23.

Da em leh kiwa pynbna chi sngi chwa wow krehkaam ka Model of Conduct neibynta ka Election MLA ha u 2023, wei ya kini ym ye wow pynmih ya ka Notification yow pynbna ki, kamtæ u Patel da ong u wa da leh yeini du neibynta wow yoh myntoi ha ka Election da ka sorkar warim.

Da ong u leh i rukom chna ya ki District thymme ymtoh deiwa pyrkhat bha nadooh wow em i suk i saaiñ wei khlem da pynbiang leh ki yung krehkaam neibynta kini ki District thymme kamjooh ka mang poisa yow pyndap yeiwa emkaam ki.

Related posts

Em 151 tylli ki kreh wa thylli, phah u Wailad ya ka DSC wow thooh lada dang em chooh kiwa wa lait

May 16, 2025

Lai ood ki MDC ka VPP ha ka sorkar wym yoh Scheme sorkar pyrdi ha ki Constituency wa em ha sor

May 13, 2025

Kamtæ ka sorkar wa katni da thung ko da ka Cabinet Sub-Committee wa ka High Level Expert Committee wa khlieh da u Dr. Lalit K Panwar, Rtd. IAS kiwa da wanrah ya ka Report ki wei hadien wa bichaar yeini da rai wow pyndam noh 9 tylli na ki 17 tylli ki District wa da pynbna thymme wa kynthup ya ka Anupgarh, Dudu, Gangapur City, Jaipur Rural, Jodhpur Rural, Kekri, Neem Ka Thana, Sanchore wa Shahpura deilang wa 3 tylli ki District thymme kiwa kynthup ya ka Banswara, Pali wa Sikar.

Ki 3 tylli ki District wa da pynbna chwa wow krehkaam ka Model Code of Conduct wa kynthup ya ka Malpura, Sujangarh wa Kuchaman City leh u pyndam noh ki.

U CM warim ka Rajasthan, u Ashok Gehlot da beiñ u yeini deiwa ong wa ka sorkar kawa katni ym em biang kiwa yahkhmat ko neibhah da chimpor chi snem wow chim ki ya ka rai. Deiwa pynrap leh wa ka Rajasthan toh kawa heh dooh ka jylla hapoh ka ri wei hawa chna ya ki Division wa thymme toh deiwa pyrkhat bniah bha wei deiwa em ki District wa rap khian man ko iwa myntoi ya ki paidbah.

Da e nongmuna u ya ka Gujarat kawa khian bar ya ka Rajasthan da em ko 33 tylli ki District.

Ka Rajasthan kattu u em ko waroh 7 tylli ki Division wa 41 tylli ki District wei ya ki 8 tylli ki District wa thymme ki wym em chah pyndam kitæ ka Phalodi, Balotara, Kotputli-Bahrood, Khairthal-Tijara, Beawar, Deeg, Didwana-Kuchaman wa Salumber, neiliang ka sorkar daw pynbiang ko yeiwa emkaam ki