Khliehriat: Katkam ka khubor wa da yoh lyngba u S. Dkhar, Secretary Chnong ka Umsatai, Elaka Rymbai, East Jaiñtia Hills District, da pyntip wa u L. Shylla uwa man u Waheh Chnong ka Umsatai da phah u ya ka chithi wow pyndam noh ya ka NOC kawa da e ha ka 4 Naikhynde (September) 2019 ya ka M/s.Unique Industry Coke Factory.
Kani ka Unique Coke Factory da thmu ko wow booh ya ka karkhana pynmih Coke ha Wah Deiñling kawa haap hapoh u pood u ang yong ka chnong wei i daw wa pyndam ya kani ka NOC toh nei pyrchah joor ki paidbah ka chnong Umsatai.
Katkam i ong u Waheh Chnong, da chim ya kani ka rai toh ha ka dorbar ka Chnong kawa man ha ka 13 Wisu (March) 2020 neidaw wa pyrchah joor ki paidbah ka chnong ya katai ka Coke Factory heiwa da pyndam noh u yaka NOC wa da e haka 04-09-19 kam u Waheh Chnong wa em i kitkhlieh.
Ya kani ka chithi da e bor ya u S.Dkhar, Secretary Chnong Umsatai lyngba u Waheh Chnong (Authorized Letter) wow wanrah ha ka 21 Naiynñiaw kawa toh ka sngi kawa e chithi ha ka Secretary, Executive Committee, JHADC, lyngba ka Join Action Forum (J.A.F) kawa kynthup ya ki soo seiñbhalang kiwa kynthup ka SBYWA, JSM-ER, JYF-EJH, NEIPF-SEBR, wa ki soo chnong wa kynthup ka Umsatai, Ladwahwapung, Deinsatlang, Pynurkba neibynta wow pyrchah ya katai ka Coke Factory ha Wah Deiñling hajrong i pyrchah joor ki paidbah.
