U Speaker ka Yung Dorbar Chna Aiñ yong ka jylla, u Thomas A Sangma da pynbna u hapoh ka yung dorbar wa da pyndam noh wow booh ha ka thup (Record) hapoh ka yung dorbar yei klam wa pynthut heipor wa e u Lat ka jylla, u Phagu Chauhan yei klam wa tip kam ka Governor’s Address.
Ini i pynbna yong u Lamphang toh hadien wa da yatai biang ya ka phang hajrong i klam u Lat dei ktien Hindi hapoh ka dorbar mang tangka.
Ha kani ka sngi sdang yong ka dorbar mang tangka ka jylla, u President ka VPP uwa man leh u MLA ka Nongkrem, u Ardent M Basaiawmoit, da yieñ u wow pyrchah yei klam u Lat dei ktien Hindi neidaw wym ye u sñiawthooh, iwa da pynman leh ya ki MLA ka VPP wow mih syndon napoh ka yung dorbar khlem da ap de yeiwa klam u Lat.
U Speaker da ong u wa ini ym toh ka sien wa nyngkong wa u Lat da klam u dei ktien Hindi, heiwa heipor wa man Lat u Ganga Prasad da e u yei klam dei ktien Hindi.
U Thomas da pynsñiaw u yei sñiawsih hajrong i chah pynthut i klam yong u Lat, heiwa da ong u wa ka yung dorbar sñiawthooh ko yei wym ye u Lat wow klam dei ktien English, wei yei klam u Lat da booh hapoh ka yung dorbar kawa da thoh dei ktien English yow sñiawthooh lang waroh. Da ong u wa ymtoh i rukom wow pynthut ha i por wa u Lat dang e u yei klam wei ini i pynthut pynyoo ko yei wym miat hapoh ka yung dorbar, kamtæ da hap wow pyndam noh ya iyi wa ong hawa pynthut heipor wa dang klam u Lat ka jylla.
Hachwa ini, u Montri ka chnat Parliamentary Affairs, u Prestone Tynsong da dawa u wow pyndam noh ya iwa da klam u Ardent uwa da beiñ ya u Lat wa klam u dei ktien Hindi deiwa pynbaad u leh wa ini toh i pyrchang wow pynbor u klam dei ktien Hindi.
