Khliehriat: Ka East Jaiñtia National Council ha kani ka 24-09-2016 da mih madan ko yow pyndeiñ lama yong ya ki kari waphær waphær nadooh ki kari samen hadooh ki kari kamai hapoh ka EJH District kam i dak kynmoo warom ya i dap ar snem i dooh ya ki ar tylli ki mynsien, ka kong Setlang Phawa wa u Derest Siangshai kiwa man kam ki khlawait ka district heipor yakhih pyrchah khang tih mooyong wa da pynman da ka MIPRL heiwa da khut ko da ka Indefinite Economic Blockade ha East Jaiñtia Hills.
Hadien i pyndeiñ lama yong, ka seiñ deilang wa i synran ka HYC-JHD wa ka WJNC da pynman ki ya ka yalang wa tbian ha pchem ka skur Khliehriat HSS wei ya ka ka yalang da pyllai da u President ka EJNC.
U Shanbok Syad President ka EJNC da ong u wa sniaw lyngoh hadooh kini ki sngi leh dang pynslem ka sorkar u pynmih ya kiwa em kti u siat yap ya ki tai ki arngut, hanla hadien wa da dep pyndep la ar tylli ki takit (Magisterial Enquiry). Da ong leh wa neiliang ka seiñ ym chong kli kti ko wei daw yachem kyrpang ko ya u HDR Lyngdoh, Home Minister yow pynsñiaw sa chisien ya ini i jia ha Mookhep.
Da klam u leh yei pynslem yong ka sorkar u pyllait ya u Chairman ka JNC u Sambormi Lyngdoh wei ye u em iyi næ iyi chalyndet kani neibhah du neidaw wa chah suba wa chah kynnoh wa emkti lang u wa ka HNLC da kset patok ya oo kattu la 2 bnai. Neiliang ka seiñ kwah ko leh u pyllait noh ya oo deiwa khlem em iwon iwon i kyndon ka aiñ wow kdoh ya oo.
Discussion about this post