Jowai: Ka Synjuk ki Waheh Chnong Jowai ynne ka sngi da pynman ki yei yakhih wa jai-jai deiwa rah Placard ha pchem ka yung krehkaam PWD North Division wa em ha Ladthadlaboh, Jowai kam ka dak wow pynyoo yei pyrchah joor ya i thmu ka sorkar jylla wow kyrriah ya kani ka Division cha Shangpung.
Heiyatoh waka yurim wa pyrchah da kdaw ki deiwa ong wa kani ka yung krehkaam daw chem chitom ko heiyatoh wa kiwi ki chnat krehkaam kiwa haap ko u yatyngkhooh kam ka yung krehkaam u Deputy Commissioner, WJH, ka Superintendent Engineering PWD Road, ka Treasury wa ki Bank.
Da ong ki leh wa i em waroh ki Division ka PWD ha kawi don ka thaw daw pynsmat ko yei kaam ki bru wa yatoh kam haki Division waphær waphær.
Heiyatoh won wa i thmu ka sorkar wow wanrah da ka Mini Secretariat ha Jowai, neiliang ka Synjuk da ong ko wa pdiang hi ki ya katæ ka Mini Secretariat, wei wymtoh won u rah yeiwa da em chwa.
Heijooh i por da ong ko wa i sah ki kreh (Project) ya kiwa da sdang ha Jowai kam ka Iawmusiang, BEd College, ka Myngot Water Project namo ka Scheme saam um ha Jowai, ki sarok ki luti syngkieñ ymtip hadooh mynnu u chna pyndep ya ki wei kat ya ka Mini Secretariat won tip kammon u jia ko.
Da kyntu ki leh yaka sorkar wow pyndep ya ki kaam (Project) wa sahteiñ wei wow pait ya ki yung krehkaam ki chnat wa da jæd da pra.
Kani ka synjuk toh kawa kynthup ya ki 21 ngut ki Waheh Chnong ka Jowai.
Hadien ka yakhih da chong pyrkhat ki ya ka luti wow wan heiwa da chim ya ka rai wow pteiñ yei yakhih mynstep ka sngi wei daw pynbood leh da ki yakhih wow pynsñiaw ya ki paidbah.
