Kam chibynta wow ye u lai cha Arunachal Pradesh waroh chi snem, ka Border Roads Organisation (BRO) da ye ko wow pyndep ya i tympdung wa khaddooh hawa tih ya ka Sela Tunnel wei yeini da sakhi da u Montri yada ri ynnin ka 14 tarik da u Rajnath Singh lyngba ka Video Conference uwa da ong leh wa kani ka Sela Tunnel, kawa em ha West Kameng District ka Arunachal Pradesh daw pyntikna ko kani ka thaaiñ daw yoh ko yei roi i paar wei daw pynkhlan ko yei ye u yada ya ka ri.
Ha u 2019, u Prime Minister Narendra Modi da booh u ya u mooyurim ya ka Sela Tunnel Project, heiwa ynnin deiwa tympdung ya thaw lai kari namo ka Main Tube da man kam i dak wa da pynkut yei tih wei da sah wow chna pyndep. Katkam wa pyntip ka Ministry of Defence, i kreh wa da dep ha kani ka Tunnel wa jrong 980 Metre toh da pyndep hadooh 700 Metre.
Kani ka Sela Tunnel toh kawa em 13,800 ft na sla duriaw, kawa em ha u sarok 317 Km ha Balipara-Charduar-Tawang (BCT) Road. Da pynyabi ko leh ya kiwa boon ki District ka Arunachal Pradesh wa kynthup ya ka Tawang, West Kameng wa East Kameng wa waroh kawi ka ri. Kani ka Tunnel daw yarap ko wow lai cha Tawang ha iwon iwon i por wei daw pynduna ko leh yei chimpor.
Hadien wa dep chna ya kani ka Tunnel kawa jrong 1.5 Km daw man ko kawi na kiwa jrong dooh ka Tunnel Bi-Lane Road hapoh pyrthai kawa em ha 13,800 feet.
Ya kani ka Tunnel da tih napoh ki thaw wa hap yor deiwa pynemkaam da ka New Austrian Tunneling Method heiwa ym emkaam de u pynkhooid ya ka yor hanla haap ko leh i wym pynthut de yei lai i wan lyngba ka Sela Pass iwa katni manda joor ka yor jooh hap khang ya uni u sarok wa lai cha Tawang.
Neiliang u Montri da kaweh lama u leh ya ka ‘India @75 Motorcycle Expedition’ kawa pynman da ka BRO kam i dak burom ya ki chipai wa da dooh yei mynsien neibynta ka ri.
Kani ka lai luti da ki thuk-thuk daw chimbynta da ka ki 75 ngut kiwa na ka BRO, wa kynthup ya ki Indian Army wa ki bru ka General Reserve Engineer Force kiwa daw lai luti kamwa 20,000 Km ha ki 75 sngi.
Kani ka Motorcycle Expedition toh kawa daw sdang nadooh na India Gate, New Delhi dep te lai na Khardung La, Rohtang wa Umling La. Wei daw pteiñ biang na Srinagar cha Siliguri.
Ka bynta wa khaddooh toh na Siliguri cha Doom Dooma lyngba ka Gangtok. Daw lai leh cha waroh ki jylla ka thaaiñ mihsngi chwa wow poi cha Kolkata. Hadien ini daw lai na rood duriaw ka ri wei daw lai won cha ki ri chyiap ka ri wei daw pynkut deiwa liwan ha Delhi ha ka 27-12-21.
