Ka Pt. Deen Dayal Upadhyay Community College (DDUCC) for Skill Development, Wahiajer kawa man ka chnat puræ yong ka North-Eastern Hills University (NEHU) ha ka 4 tarik uni u bnai da pynkut ko ya ka e sikai “Electrical Wiring” wa yatoh neibynta u pyndait sainar bordiñ ha ki yung ki sem, ki yung krehkaam sorkar wa kiwi de.
Ya kani ka e sikai da pynman ha ki 6 sngi nadooh ka 25-02-25 hadooh 4 tarik uni u bnai, wei da em kamwa 50 ngut ki khynroo wa wan chimbynta na ki chnong waphær waphær na kylleiñ ka Ri-loom Jaiñtia.
Ha kini ki ynru sngi kiwa wan chimbynta da yoh ki yei tip wei chemphang na kiwa sikai ya ki heiyatoh i rukom pynpoor næ pyndait ya ki sainar bordiñ na kawi ka thaw cha kawi tawon, la ha ki yung ki sem ki bru, ki yung krehkaam sorkar wa kiwi, weiwa kammon u pynbha pynpliah chooh chooh ki yeiwa da tip chwa.
Ha kani ka sngi pynkut ya kani ka e sikai da emlang u Hunbait Chyrmang, Executive Engineer, Meghalaya Energy Power Distribution Corporation, West Jaiñtia Hills District kam u kongsan, u Andrew Sari, Secretary ka chnong Wahiajer kam u symbood kongsan, ka Regina Sympli kam ka Resource Person, ka Prof. (Mrs) S.M. Sungoh, Principal I/c, DDUCC wa u Prof. H. Lamin, (Retd) Founder Principal I/c, DDUCC.
Hawa e yei klam kini ki waheh da yaroh ki yei em kam kani ka thaw e sikai ya ki khon khynroo khyllood, kawa pynchlur ya ki wow kreh ya kiwon kiwon ki kaam wa da yoh sikai wa kynthup ha ka kaam leh Electrical Wiring. Da pynchlur ki leh ya ki khon khynroo kiwa sdang thooh khih thooh kreh yow wan ki cha kani ka thaw e sikai wow ye ki u pynpliah khnang wow pynlai yeiwa im ki deiwa chimbynta ha ki jait e sikai waphær waphær wa em ha kani ka thaw. Neibhah deiwa pynpliah yei sap ye leh u pynheh yei khih i kamai wei ye u yieñ hei kjat yong ki hi.
Da ong haroh ki wa kani ka e sikai man ko kam chibynta i e kti yarap wa rap yillu yong ka DDUCC/NEHU neibynta u pynku yei tip i stat i roi i paar ha ki bynta waphær waphær kam chibynta ka NEP 2020, kawa man leh katkam i thmu yong u (L) Pandit Deen Dayal Upadhyay.
Da pynkut ya ka yalang deiwa saam Certificate cha kiwa chimbynta wei klam e khublei na u Wolnish Rymbai kam u Programme Co-Ordinator.
Discussion about this post