Ka Pt. Nehu-Deen Dayal Upadhyay Community College (DDUCC) for Skill Development Centre Wahiajer ha ka 19 tarik uni u bnai da pynkut ko yei e sikai thaiñ that Wool wa tip kam ka “Hand Made Woollen Knitting Making” kawa ynñiaw sngi ya ki khynroo khyllood kawa pynman nadooh ka 12 tarik hadooh 19 tarik.
Ha kani ka yalang pynkut da emlang u Reformingson Lamare, MDC ka Nartiang-Wahiajer kam u kongsan, u Lovely Shylla kam u symbood kongsan, ka S.M. Sungoh, Principal I/c ka College, kiwa chah khut sñiawbha wa kiwi.
U kongsan hawa klam da yaroh u ya kani ka College kamjooh ya kiwa wan chah sikai, deiwa pynchlur leh ya kiwa dang thooh khih thooh kreh kam hei jait thaiñ that wow pynemkaam hok wei wow pynpliah ya idæ.
Chooh chooh ong u lyngba ini i chah sikai daw wai laad haroh ko ya ki yow ye ki u pyndap pynbiang yei emkaam ka yung ka sem kamjooh heiyatoh ki that ki nep.
Ka S.M. Sungoh won da sñiawkmen ko wa ye u pynpsiah ha kani ka chlem e sikai sa kam kani ka jait sikai thaiñ kawa ye bha u e yarap.
Da ong ko leh wa kam kini ki jait thaiñ that hanlada man i iwa da jan wiar na ki daw waphær waphær, tangwa da e mynsien ko ya kiwa chimbynta wow kit ki ya ka lyngkor yow yaleh pynneh pynsah ya kam kini ki jait thaiñ wa pynemkaam dei kti yow tyrchaaiñ ka jaitbru.
Da pynchlur ko ya kiwa chimbynta yow yieñ ki hei kjat yong ki hi wei wow kheiñkor leh yei tip i stat.
Chooh chooh ong ko kani ka e sikai man ko leh i e kti wa rap yillu yong ka DDUCC waka NEHU neibynta u pynku yei tip i stat, i roi i paar ha ki bynta waphær waphær kam chibynta ka NEP 2020, kawa man katkam i thmu yong u (L) Pandit Deen Dayal Upadhyay.
Da pynkut ya ka yalang deiwa saam ya ki Certificate cha kiwa da pyndep yei chah sikai wei da e yei kyntien e khublei na u Wolnish Rymbai, Program Co-Ordinator ka DDUCC.
Discussion about this post