Ka Sang Sngi Shiar Wakhu ka Raij Barato da pyndep haka sngi Mukso ha ka 27 tarik uni u bnai da u Langdoh wa u Tymmen Waheh.
Ha uni u snem ya kani ka kaam niam da toh ka pali u pyndep da ka jait kur Shadap deilang wa u Sangot Raij, ki Tymmen ki San wa ki khon ka Raij waroh hi.
Ya kani ka leh niam da pyndep chwa u hiar ah kba ki khon ka chnong ka thaw wei ya kani ka kñia niam da jooh pynman ya ka man-u-snem ha ka sngi Mukso deilang wa ki rong ki rup ki dieñ ki proh deilang wa u klong u skow, i pyrnah pyrjin waka Pliang Ksiar Pliang Rupa.
Ha kani ka Kñia Shiar Wakhu da ngooh da dem lang ya waroh ki khon ki hajar yong ka Raij wa ki khon ka chnong ka thaw waroh yoh u Trekirot Kynrad u da u kær na ka pylliang ka langthari, yoh u Syiem Sakho u poi yung poi sem dei suk mynsien, yoh u dap snem dap bnai ki khon u Ynñiaw Wasa Wasung.
