Pyndep ka Raij Jowai ya ka Kñia Khang wow e ngooh ya ki Soo Dwar Soo Luti wa ka Tawiar Takan

Ynne ka Sngi Muchai ka 20 tarik, ka Raij Jowai ha ka yurim i sikai niam wa da pynjooh na warim wajah wow e i sñiawngooh i makhane yei kyrkhu wa da yoh wei wow kyrpaad kyrpon na u Trekirot wa ki Blai ki Syiem yow nang yoh chooh ka Raij ka chnong yei imsuk imsaaiñ, da pyndep ko ya ka Kñia Khang kawi na ki lehniam næ kñia e ngooh wa toh u leh u pyndep chwa wow poi ki Soo Sngi Le Yaaw yong ka lehniam Behdieñkhlam hapoh ka Raij ka chnong.

Katkam ka hukum adong niam da ong wa ki Soodwar Sooluti wa ka Tawiar Takan toh ki Blai Chnong Blai Raij wa da pynchong pynthiah nadooh wa sdang ka Raij ka chnong heiwa i em yong ki ha man ki phang ka chnong ka thaw khang kah wei beh pakhot panang ki yeiwa sih waroi wa ang wa hiap waphær waphær wow psiah u mih chapoh ka chnong ka Raij.

Ya kani ka kñia e ngooh e dem, e bhet e bhar ya ki Soodwar Sooluti wa ya ka Tawiar Takan da pyndep haman ki phang yong i thaw wa em ki kiwa kynthup yow Mookhai, Mooralong, Moosniang, Mootong wa ya ka Syiem Myntdu kawa man ka wah wa kær talawiar ka Jowai.

Hadien wa dep i kñia na man ki phang yong ki Soodwar Sooluti da pynbood won ha Madan Ryngkaw wa em ha Tpep-Pale heiwa da chet da tu, da em i ngooh i dem wa i suit i choor wa i ya baam yonglang ki paaid ha kani ka sngi.

Related posts

Ha ka Behdieñkhlam ka Raij Mukhla lyngba ka Internet sakhi u Montri ka sorkar pyrdi, wai u leh ya ki kreh wa chongdor Rs. 1.93 klur

August 31, 2025

Pynskem Unit ka Seiñ Kur Suting ha chnong Moosakhia

August 31, 2025