Ka lehniam Kbai Mooknor hapoh ka Raij Jowai toh kawi na ka rukom ka dustur kawa u Dolloi, u Pator, u Langdoh, ki Sangot, ki Wasan wa ki Phra Kur Phra Kmai hap ki wow leh wow pyndep chwa wow poi ka sngi yong ka lehniam Thoh Langdoh.
Kamtæ ynne ka sngi Musiang ka 15 tarik da sakhi wa ya kani ka lehniam da pyndep hakhmat ka Yaaw ka Syiem ha i thaw wa em ki Mooknor ha Iawmusiang, Jowai wei man ko leh ka lehniam wa nyngkong dooh yow pynkhreh ya ka Behdieñkhlam.
Katkam ka rukom ka dustur wa pynjooh sikai ki khon ka Ñiamtre wa em hapoh ka Raij Jowai kamjooh kiwa chong wa sah cha baar ryngkaw wa nadooh kani ka sngi katkam ki adong niam da ong wym hoi de u rah chyieñ ya ki bru wa yap nabar ryngkaw chapoh ryngkaw kat hadooh wow poi ki sngi ka tayaaw yong i pyndep ya ki soo sngi le yaaw yong ka chaad ñiam Behdieñkhlam.
Kiwi de ki lehniam wa daw hap pyndep hadien ka Thoh Langdoh toh ka Chaad Thoh iwa man neibynta wow pynhaap yow symbe yow phniang chapoh pynthor wei daw pynman biang yei Kbai Mooknor ha kani biang ka jooh ka thaw kawa tip kam ka Kbai Mooknor Kñia Khang wei hadien kani won daw em sa ka Kñia Pyrthat kawa daw embynta da ki Soo Langdoh ka Elaka Jowai yow pyndep niam yow e ngooh ya u Pa Pyrthat.
Hadien kani daw pynman sa ka Kñia Aitnar kawa man chirup ka soo sngi le yaaw ka pyndep lehniam Behdieñkhlam.
Discussion about this post