Ka Raij Jowai ynne ka sngi da pyndep ko ya ka lehniam Thoh Langdoh kawa man kawi na ki lehniam næ kñia e ngooh yong ka Raij Jowai kawa da pyndep ha Khloo Langdoh ha i thaw wa em u Moo Langdoh.
Chwa wow lai pyndep ya ka lehniam dang step, da em i yachem ki waheh ha Yung Langdoh nadooh u Dolloi, Pator, Langdoh, Ki Sangot, Ki Wasan, Ki Phra Kur-Phra Kmai wei chwa wow mih da e ya ka Wyrta Chula cha ki khon ka Raij da u Chutia wow pyntip wa ynne ka sngi toh wow pyndep ya kani ka lehniam wei hadien ini da mih wow lai dei kjat hadooh wa poi ha Khloo Langdoh na Khliehchnong.
Kani ka sngi Thoh Langdoh katkam i sikai niam ha ki khon ka Niamtre da tip leh ya ka heiwi i kyntien kam ka sngi ‘Sang Sngi’, ka sngi heiwa ka Bei Rymaw-Rymchit yoh ko yei man khroo man kyntang heiwa ki paidbah wa chong chnong kamwa yah wa ty’oor ki warim yait ki nei pyntakha tadaiñ wei pyntngit pynjngut yei doh i pran ka Bei Rymaw heiwa ymhoi wow tih u pooh wow kreh ha kpær, ymhoi wow thung, u thang yei jhep næ kiwon kiwon ki kaam wa ktah ya ka Bei Rymaw.
Ha kani ka lehniam da pyndep ya i kñia da u Sangot Paswet wei da pynman ya ka Dorbar ki Kñi wei hadien da em i ngooh i dem i suit i choor wa i baam ya i doh kñia.
Manda liwan cha Yung Langdoh, ka bynta wa khaddooh yong kani ka sngi Thoh Langdoh toh i thung ki Wasan yow symbe toh, symbe saru ha kpær wa em ha Yung Langdoh iwa tip heiwi i kyntien kam ‘Ka Thung Sang’.
Discussion about this post