Jowai: Ka lehniam kniakhang toh kawi na ki lehniam næ knia e ngooh e dem e bhet e bhar wa chisien chisnem ka Raij Jowai ya ki Soodwar Sooluti wa ya ka Tawiar Takan kiwa man ki Blai Chnong Blai Raij wa da pynchong pynthiah da ka hukum Blai wow man ki nongda nongker ya ka chnong ka thaw nei waboon i sih i roi yong ka pyrthai myndær wa wan ha ki dur ki rukom waphær.
Ha uni u snem ya kani ka lehniam da pyndep ha ka sngi Muchai 14 tarik Naiynru haman ki phang wa em ki Soodwar Sooluti kiwa kynthup yow Mookhai, Mooralong, Moosniang wow Mootong heiwa yei lehniam næ knia e ngooh e dem e bhet e bhar da pyndep da ki Sangot wa ki Wasan waheh deiwa bood ryntih leh ya ki hukum sorkar kat kam wa da pynmih na ka chnat krehkaam i chait i khiah.
Hei khana u Dolloi, u waheh Puramon Kynjin da ong wa i lehniam ha uni u snem man i iwa miat wabha wei hun Blai hun Syiem, katkam ki dak ki chin wa pynyoo ha ki lehniam yong waroh ki Soodwar Sooluti wa kamjooh ya ka Tawiar Takan. Neiliang u Dolloi e u leh i sñiawngooh wa khroo ya waroh kiwa chongyaw chonghat wa ki paidbah kiwa da e kyllooid mynsien cha ka khrong ka tri wa kamjooh leh ya ki khon ka Raij ka chnong kiwa da yakrehlang hei wow pyndep yei mon i khe u Trekirot kiwa yatoh wa kani ka lehniam kamjooh neibynta i burom ki Blai Chnong Blai Raij wa ki Ryngkaw ki Samun.
