Ynne ka sngi ka Raij Mynso da pyndep ko ya ka lehniam Kñia Blai Langdoh ha Khloo Blai ka Raij katkam wa da jied da ka Seiñraij ya kiwa chimbynta ha kani ka lehniam.
Ha kani ka Kñia Blai Langdoh da pyndep ya ka kñia da u Kñi ka Yung Langdoh ha i thaw kñia heiwa da chimbynta du da kiwa kitkaam niam kam u Dolloi, Langdoh, Pator wa kiwi kiwi.
Hei step nawon ki khon ka Raij Mynso daw thooh ki ya ki Dieñkhlam na khloo wow rah cha man ki thlu-yung yow e i ngooh i dem ha Yung Langdoh chwa wow rah cha Khloo Blai Raij.
Hadein wa dep i kñia ha khloo Blai da mih liwan won ki cha Yung Langdoh wow batai ya ki yutang yubat yeiwa da pynbood sa i Ngooh Blai na ki Wasan waroh kamjooh kiwa kitkaam niam kiwa da khai hei step wow pynkhreh wow tah ya u Dieñ Kymphui.
