Ki khon ki rayot ka Seiñ Raij Mukhla da pyndep ki ya ka lehniam kñia ya ka Blai Syiem Khlam wa u Ram Chyllong ynnin ka sngi Muchai hapoh Duwan Kñia ha Khloo Blai. Ya kani ka leh niam da pyndep ya ka hapoh i yahluti u Pa Langdoh Niam wei chirup wa ki Waheh Sankur Sankmai, u Sangot wa u Maji Niam.
Ya kani ka lehniam da sdang ya ka nadooh i step heipor 6:00 waje ha yung Langdoh heiwa ki khon ka Seiñ Raij Mukhla ki khon khynroo chynrang da pynpoi ki ya ki kympui kiwa da tah kyrpang da ki ckhen ki siej khian wei da pynwandur ya ki hei dur yong u syntu.
Kani ka lehniam kñia e ngooh ya ka Blai Syiem Khlam wa u Ram Chyllong toh neibynta wow ri wow sumaar wow kær wow da ki ya waroh ki khon ki Rayot ka Seiñ Raij Mukhla na ka kjut ka chitom ka khlam ka ngoh, wei heijooh i por leh man ko leh ka lehniam e ngooh ya ka bei rymaw wa chwa i bet ya u symbe toh, u symbe jhoor, u salah, u saru hajrong ka snieh ka swor ka yong ka.
Ya kani ka lehniam hadien wa dadep u ya pynbait kaam hapoh yung ka Bei Langdoh, da mihlang chirup wa ki Waheh Sankur Sankmai kmai wa ki khon khynroo deilang wa ki kymphui yow lai cha Duwan Knia.
Ki khon ki rayot ka Seiñ Raij Mukhla man-u-snem kat wym pu dep yei lehniam kñia e ngooh ya ka Blai Syiem Khlam wa u Ram Chyllong tæ wym pu hoi u bet u thung ki ya u symbe toh symbe jhoor. Kamtæ ha kani ka lehniam da pyndep ya ka knia ka khriam da u Maji Niam ka Seiñ Raij Mukhla u wa ka Kur Sari.
Kam i pynsñiaw wa hapoh ka Seiñ Raij Mukhla da seiñ da dang ya ka niam ka rukom nadooh ki por nyndai nynthai da ki 5 tylli ki kur kiwa khut i kiwa Waheh Sankur, Kur Sari, Kur Suna, Kur Lyngdoh, Kur Shylla, Kur Sumer, chirup u Maji wa u Sangot Niam.
Discussion about this post