Pyndep ka Seiñ Raij Mukhla ya ka leh niam Knia Ryngkaw

Jowai: Ka Seiñ Raij Mukhla ynne ka sngi da pyndep ko ya i leh niam wa heh dooh hapoh ka Raij Mukhla kawa tip kam ka Knia Ryngkaw.

Ya kani ka leh niam da sdang ya ka nadooh ynnin i janmiet ha yung ka Langdoh ha i por 7 waje heiwa ki khon ki hajar ka Raij Mukhla da wan tooid ki cha yung ka Langdoh deilang wa ki Phan ki Piah, ki blang ki syiar ha ka miet ka 5 tarik yow leh ya ka Niam Than Blai wa Pynkhem Phan.

Related posts

Pynyoo ki khynnah yei sap wow pynlai ya ka Lympung wa kyrpang yong ki ha Tuber Shohshrieh

January 18, 2026

Daw pynman ya ka Lympung wa 29 ka Seiñ Kyntu Seiñ Raij 12 Daloi ha Seiñ Raij Nongtalang

January 15, 2026

Ynne ka sngi won nadooh i step ha yung ka Langdoh hapoh i yahkhmat u Pa Langdoh wa ki Waheh Sankur wa kynthup ya u Waheh Langdoh, Waheh Sari, Waheh Suna, Waheh Shylla, u Maji, u Chutia wa kiwi kiwi de da mih ki khon ki hajar ka Raij Mukhla wow sakhi lang ya kani ka leh niam hapoh ka Khloo Kyntang ka Raij Mukhla.

Ha uni u snem ki Phan ki Piah da em ki waroh 60 tylli, 58 tylli ki syiar wa 12 tylli ki blang. I thmu wa kongsan yong kani ka leh niam toh wow beh ya ka kjut ka khlam yow yoh yei chait i khiah wei kamjooh leh hadien wa da dep ka leh niam Knia Ryngkaw yow yoh ki khon ki raiot ka Raij Mukhla wow hiar rep hiar khih yow bet ya u symbe u phniang cha ki hali ki lyngkha.