Ka Seiñ Raij Mukhla da pyndep ko ya i leh niam knia ya ka Syiem Khlam wa u Ram Shyllong kiwa man ki Blai kiwa kær wei da yaka ri wei sumaar ya ki khun ki raiot ka Seiñ Raij Mukhla. Ya kani ka leh niam da pyndep ynnin ka 29 tarik wei ya kani ka leh niam knia toh kawa jooh leh man-u-snem ha u uni u bnai Wisu chisien chi snem hachwa wow leh yei thung i tep ya ki symbe jhoor wa kiwi ki jait thung.
I yumut yong kani ka leh niam Knia Khlam toh wa ki khon ka Seiñ Raij Mukhla wow e ngooh ya ka Syiem Klam wa u Ram Shyllong kiwa da ri wei yada yow lait na i kjut i chitom, ka khlam ka ngoh ka yap ka sa hapoh ka Seiñ Raij Mukhla.
Ya ini i leh niam da sdang ya ka nadooh i por 6:00 waje ha Yung Blai (Yung Langdoh) hapoh i yahkhmat u Pa Langdoh Niam deilang wa ki Waheh Sankur kiwa man kiwa bood yong u Langdoh Niam.
Kamtæ ha i por 7:00 waje i step da mih na yung Langdoh wow lai knia hapoh Duwan Knia ha khoo kyntang yong ka Seiñ Raij Mukhla, katwa ka Bri Langdoh wa u Pa Langdoh deilang wa ki Waheh Sankur dang ya boonkaam ki wow pynkhreh ya ki tiar knia, ki khon ki hajar ka Seiñ Raij Mukhla won da ya pynkhreh ki wow ah chrong ah chrup ya u siej wow rah cha yung Blai yow beh ya ka khlam ka chitom cha ki thaw wa jngai napoh ka Raij ka Muluk wa ka chnong ka thaw, ya kani ka leh Niam Knia da pyndep ya ka da u Maji Niam ka Seiñ Raij Mukhla uwa na ka kur Sari, wei ya ki tiar Knia da pynemkaam da u syiar chynrang wa u sniang chynrang.
Ini toh katkam wa pynlait khubor da u S. Sari uwa man leh uwi na ki Waheh Sankur na ka kur Sari.
