Ynne ka sngi ka MPSS Security Agency da pyndep ko yei e sikai wa 45 sngi wow man kam ki Security Guard heiwa da pynman ya ka yalang ha Thadmuthlong-C Phramer, West Jaiñtia Hills.
Ha kani ka sngi u Lovely Shylla uwa man u Asst. Waheh Chnong ka Wahiajer da man u kam u kongsan, u J.E.J. Sumer kam u symbood kongsan hei emlang u Dr. HCT Sumer wa kiwi.
Ya ka yalang da pynlai da ka R. Lapasam kawa man ka Instructor heiwa u Pyndap Muksor kam u Managing Director kani ka thaw da e u ya ki kyntien pdiang burom wei da khana u ya ka parom kani ka thaw.
U Pyndap Muksor da ong u wa kini ki khynnah kiwa pyndep ya ka e sikai toh ka Batch wa le, wei i daw wa sdang ya kani ka e sikai toh wow yarap yoh kreh ya ki khynroo khyllood kamjooh leh wa i e sikai toh neibynta kiwa da pyndep ya ka Class VIII chajrong.
Ya ki khynnah ynne da yahkhmat wow e ya ki kyntien kular da u Pyndap Muksor hi.
U J.E.J. Sumer hawa e i klam da kyntu u ya ki khynnah wow man kiwa kreh chitom wa kiwa kreh hok, wei da ngait skem u wa i em yong ki hawa e chakri mynried toh u sñiaw chngaaiñ ki bru wa kreh ki.
Chooh chooh da ong u wa i kreh toh wow pynhun ym du ya u bru tangwa wot ya u Blai leh kamjooh.
U Lovely Shylla kam u kongsan da ong u wa kani ka e sikai toh wow pynlait ya ki khynroo khyllood na ki kaam wa sih wa boon ngop ki.
Da ngait skem u wa deiwa pyndep ya ka e sikai u yoh kreh ki ha kiwa boon ki thaw deiwa e khublei ya u Pyndap Muksor uwa da ieh yei kreh sorkar wow sdang ya kani ka thaw wow pynmyntoi ya kiwa boon ki khynroo khyllood.
Chooh chooh da ong u wa i kreh chitom ym jooh sepai i wei da kyntu u ya ki khynnah wow ksoh yeiwa da chah hikai ki ha kani ka thaw.
Ynne da em 22 ngut na kylleiñ ka Ri-loom Khasi wa Jaiñtia kiwa da pyndep yei chah hikai kam ki Security Guard.
Kiwi kiwa da klam toh u H. Tang, Waheh Chnong ka Thadmuthlong wei da yoh ya ki kyntien khublei na u Sambor Suting, Office Assistant.
Discussion about this post