Ka Community Institute of Technology (CIT) Mowkaiaw Centre, ha ka 10 tarik uni u bnai da yoh ko wow pynman ya ka yalang pynkup burom namo ka Felicitation Programme wei wow saam ya ki Certificate deilang wa ki tiar kam ka kor soor yow yarap sdang kreh cha 34 ngut kiwa da pyndep yei chah sikai kiwa ar jait kitæ ka Tailoring wa Embroidery hapoh chnong Mowkaiaw.
Ha katai ka sngi da emlang u A. Malngiang, General Manager, DCIC Jowai kam u kongsan deilang u Lambormi Suchen, Skill Development Officer, MSSDS, West Jaiñtia Hills.
Ka Community Institute of Technology (CIT) Centre da pyndep ko wow e yei sikai soor wei wow leh Embroidery ya 34 ngut ki kynthai neibynta i thmu wow pynchlur seiñ kaam yong idæ. Ya kani ka e sikai da e kyrchaan da ka Meghalaya State Skill Development Society ka sorkar Meghalaya lyngba ka Skills Meghalaya Project.
Najrong wa da yoh wow saam ya ki kor wa ki tiar soor that cha kiwa pyndep yei sikai kiwa tip kam ki Start Up Tools. Ha kani ka sngi da yoh leh wow e yarap cha ki 17 tylli ki manyung wa dooh da ki sula wa kiwi de wa da soor da kini kiwa dep chah sikai.
U kongsan hawa e yei klam ha kani ka sngi da khana u ya chiboon ki laad seiñ kreh wa e yarap da ka chnat Commerce and Industries wei da pachat u leh chiboon ki yumut wa ki laad ki luti neibynta kiwa chah sikai wow man ki kam kiwa seiñ khih.
Da e yaroh u leh ya ka CIT kawa da kreh chitom wow wanrah kam kini ki jait sikai chadooh cha ki thaw wa em cha jngai wei da pynchlur u leh ya kiwa da dep chah sikai wow lai pynpliah chooh chooh ki yei kaam wa da sdang ki khnang wow man iwa e myntoi neini chakhmat.
Ya ka yalang da pynlai da u L. Lanong, u Director yong ka CIT wei da yoh leh yei klam na ka Cordiality Shadap kawi na kiwa pyndep yei chah sikai wei kamjooh na u Lambormi Suchen.
