Ka e sikai kawa dei mynkna wow man kam ki Web Developer kawa 400 kynta kawa da pyndep ha kini ki soo bnai, da pynman ya ka ha Jaiñtia Institute of Technology (JIT) Jowai, dei kyrchaan ka Meghalaya State Skill Development Society kawa em hapoh ka chnat Labour ka sorkar Meghalaya hapoh i pyrtuid ka Skills Meghalaya heiwa ynne da pynkup burom wei e Certificate deilang wa ki kyntien e mynsien cha ki khynroo khyllood kiwa da pyndep ya kani ka chah sikai.
Yei e sikai da wan da ki bru kiwa na ka MLCU, Shillong wei da pynman ki leh ya ka Exam hadien wa pyndep ya ini i chah sikai wa da em 46 ngut kiwa ye u pyndep na ki 50 ngut kiwa da wan chakhmat.
Haka yalang tbian wada pynman ha Kiang Nangbah Govt College Jowai, da emlang u Lambormi Suchen, Skill Development Officer, West Jaiñtia Hills, u Bankitbor Marweiñ, Managing Director JIT Jowai wa kiwi katwa u F.B. Basan, MCS, Additional Deputy Commissioner, West Jaiñtia Hills District da man u kam u kongsan.
Kam u kongsan hawa e yei klam da yaroh wei e mynsien u ya waroh ki khynroo khyllood wa da pyndep yei chah sikai, wei yooluti u leh wa i sikai wa da yoh ki daw yarap ko ya ki hei yoh khih yoh khan.
Da kyntu haroh u wow man ki bru wa pyrchang bait khlem ieh chiteiñ khnang wow yoh yei jop hawa im ki.
Da pynrap u wa toh u man leh kiwa em i bahkhlieh ya idæ neibhah hawa da heh da toh i por wow pna thooh khih thooh kreh hi ym u yang næ yooluti bait naki bei ki pa.
Ha kani ka sngi da pynkup burom leh ya ki 3 ngut kiwa da yoh nyngkong, wa ar wei wa le ha ka Exam.
Discussion about this post