Kam chibynta wow yarap u wai ki laad pynyoh khreh ya ki khynroo khyllood, ha ka 11 tarik uni u bnai, 49 ngut ki chynrang wa kynthai da pyndep ki ya ka e sikai wow e yada namo wow man kam ki Security Guard kawa da pynman ha looksi Umdeinlin, West Jaiñtia Hills da ka Tornado Security Agency.
Ya ka yalang pynkut ya kani ka e sikai da pynlai da u P. Muksor uwa man u Camp Commander & Training In-charge heiwa da emlang ka CW Lyngdoh, DSP ka West Jaiñtia Hills District kam ka kongsan wa u Fernando Sumer kam u symbood kongsan.
Ya kani ka sngi pynkut namo ka Passing Out Parade da yahkhmat wow e ya ki kyntien kular da u Rev. N.K. Syngkli.
Neiliang yong ka kongsan da kitbok kitrwiang ko ya kiwa pynlai ya kani ka thaw e sikai neibhah da man ko ka chlem wow yarap e khih e kreh ya ki khynnah ha kam kani ka juk wa katni ha ki chnat waphær waphær.
Neiliang u P. Muksor da ong u wa da yoh mynsien u nei wan ka C. Lyngdoh kamjooh leh ki bei ki pa ki khynnah kiwa da wan sakhi ya kani ka sngi.
Da ong u leh wa lada ki khynnah em ki ka mon wei mynsien daw wai bait ya ka laad ya ki.
