Ka NEHU Deen Dayal Upadhyay Community College for Skill Development, Wahiajer da pynman ko ya ka Skill Training Programme neibynta u sikai rep ya ki ar jait ki tit kiwa tip kam ki Oyster Mushroom wa u Button Mushroom.
Kani ka sikai wa da e toh kwa da yabhah hapyrdi ka Theory wa Practical kawa da pynman ha ki 5 sngi kitæ nadooh ka 24 hadooh ka 28 tarik uni u bnai heiwa da wan ya chimbynta kamwa 50 ngut ki khon khynroo khyllood wa ki warep na ki thaaiñ waphær waphær napoh Jaintia Hills.
Ya kani ka Skill Training da wan wow wai da u Prof. (Rtd) H. Lamin kam u kongsan uwa man leh kam uwa seiñ ya kani ka College wei ha ka sngi wa pynkut da wan da u Prof. D.K Biswal, AR Planning I/c NEHU, Shillong.
U Prof. P.S Shukla, Vice Chancellor, NEHU da e u yei yaroh ya ka Prof. S.M. Sungoh kawa man kam ka Principal ka DDUCC kawa da ye u pynman ya kam kini ki jait sikai waphær waphær man-u-bnai hei wow e sikai ya ki khon khynroo wa kamjooh ya ki warep yow ye ki u seiñ khih dei yong ki hi.
U Vice-Chancellor da kular u leh wow e yarap waphær waphær yow pynman man-i-por ya kam kini ki jait e sikai deilang wa ki Scheme kamjooh wow pynbiang yeiwa emkaam yow pynku ya ka thaaiñ Jaiñtia wei wow phah leh ya kiwa sikai kiwa pliah kiwa yatoh waka juk kawa katni khnang yow ye ki wow kyrchaan rap bha chooh chooh ya ki khynroo khyllood i wow kyntu leh yei yoh i kot ka Ri Jaiñtia waroh kawi.
Da pynwai ya kani ka e sikai da ki kyntien sñiawngooh na u Wolnish Rymbai uwa man kam u College Programme Co-ordinator ka DDUCC, wei da saam leh ya Certificates cha waroh kiwa chimbynta.
Discussion about this post