Pyndep ki 53 ngut ya i chah hikai wow man kam ki Security Guard ha Iooksi

Ynne ka sngi ki chynrang wa kynthai wa em kamwa 53 ngut wa chah hikai wow man kam ki Security Guard kiwa man kam ki 8th Batch yong ka Tornado Security Agency da e ki ya ki kyntien kular hadien pyndep ki ya i chah hikai yong ki kawa 45 sngi wei kini toh kiwa wan na kylleiñ ka Ri-loom Khasi wa Jaiñtia.

Ha ka yalang wa pynman ha Umdieñlin, Iooksi ha i thaw chah hikai, da wan u MDC ka Jowai North, u Brightstar Chyrmang kam u kongsan katwa u Standbyme Sari won da man u kam u symbood kongsan.

Ya kani ka yalang da pynlai da u Pyndaplang Muksor uwa man u Camp Commandant wa Training In-charge ka Tornado Security Agency, Umdiengling, Iooksi.

Neiliang ki 53 ngut da e ki yei rwai kamjooh i March Past wei da chim ki leh ya ki kyntien kular hapoh i yahkhmat u Dr. P. Nongbri hajrong ka Kotbah. 

Da pynyoo leh ya i kylla changprah namo i Gymnastic, i ku tylle, Pull-Up, Push-Up, Crawling wa kiwi.

U Pyndaplang hawa e yei klam da ong u wa nachwa jooh kreh u kam u pulit ka jylla wei da ieh noh u yei kreh la kamwa 5 snem wei da sdang u ya kani ka thaw sikai wa tip kam ka Tornado Training Agency. 

Da ong u wa manda yoh ki yaka Certificate ynne man ko kam ka wait heiwa daw ye ki wow thwat yaka luti yong ki wei da e nongmuna u ya ki thaw wa da ye ki khynnah u yoh kreh ha kylleiñ nadooh na NEIGRIHMS, ki Bank, ki yaaw wa kiwi kiwi.

U Standbyme hawa e i klam da yaroh u ya u Pyndaplang wa da ye u wow pynlai ya kani ka thaw kawa da ye sakhiat wow e sikai ya ki khynnah. 

Da ong u leh wa katni em chiboon ki dukan heh kam ha Jowai kiwa da booh ya ki Security Guard wei khlem em i chah hikai wa ka Certificate man iwa eh wow yoh kreh ki.

U Brightstar kam u kongsan da ong u wa emkaam bha kam kani ka thaw sikai ya ki khynroo wow yoh kreh ki wei ini man i chynna jngai kiwa pynlai ya kani ka thaw.

Da ong u wa i akor, i biang por wa i bahkhlieh toh iwa emkaam bha khamtam ha kam ini i kreh neibhah hadien kiwa e kreh daw emkaam ki yei chaniah ha phi ki khynroo wot hadooh wow e ksoh ya u chabi dukan leh.

Ha kani ka sngi da yoh leh ya i klam na u MDC warim ka Rarliang, u B. Iano, u K. Ymbon u pulit ka Saphai Police Outpost wa u W. Phawa na kani ka thaw wei da saam leh ya ki khusnaam waphær waphær.