Ki khon khynroo khyllood wa em 65 ngut kiwa em 18 hadooh 34 snem i rta kiwa napoh ka jylla Meghalaya, ha ka ar tarik uni u bnai da pyndep ki ya ka e sikai deiwa chimbynta ha ka Passing Out Parade yow man kam ki Unarmed Security Guard (USG) ha i thaw sikai wa em ha Iooksi Umdiengling, WJH.
Ya kani ka Passing Out Parade da wan wow sakhi da u MDC ka Barato-Mukroh Constituency u Aiborlang Shadap kam u kongsan deiwa emlang u Pastor D. Tang uwa da pynsmai leh ya kini ki 65 ngut.
Da emlang leh u H.B. Thapa naka Saphai Out Post wa kiwi de kiwa chah khut sñiawbha kam u M. Suchiang, u P. Bhoi, u I. Manar, R. Kanai, u J. Lyngdoh katwa naka yung krehkaam ka USG (U.EX.S.S.A) Security Guard Agency Shillong kawa pynman ya kani ka e sikai da em u R.A. Marak deilang wa kiwi de ki bru u.
Neiliang u kongsan da e u yei kyntien sneiñ kyntien kroo deiwa ong wa dap u dei kmen hadooh kattæ kattæ wow yoo ya kam kani ka e sikai deiwa e khublei leh ya u Pyndaplang Muksor uwa da wanrah ya kani ka Training Centre yow yoh khih yoh kreh deiwa pynrap wa manda yoh kreh wow man kiwa kreh hok wei ymtoh leh u ang lane kwah syndet ya ka nong lane tulop wa heh tangwa wow man kiwa yaichah yow yoh u soh wa thiang, wei neiliang yong oo daw pyrchang u leh u thooh ka laad ka luti kammon wow yoh yarap u pynheh pynyaar ya kani ka Training Centre.
Neiliang u Pyndaplang Muksor uwa man kam u PLO (Public Liaison Officer) da e khublei u ya waroh kiwa chimbynta ha kani ka sngi wa kiwa da e sñiawbha kam u C. Lyngdoh, Dolloi ka Raliang uwa da e sñiawbha da u khoo wa ki baam dih-cha, u L. Langstang uwa na Sohkymphor uwa da e sñiawbha da ka ksiñ wei da e khublei u leh ya ka chnong Umdiengling wa da e ko ya ki tiar pynsawa wa ki chuki heipor wa em yalang. Da e khublei u leh ya u Lineman, u Wompher Phyllei uwa da pynbiang ya ka bordiñ kamjooh ya ka D.M. Shadap, Camp Commander wa yaka F. Muksor, Instructor.
Chooh chooh da ong u wa em ki por wa dooh kyrmen u neibhah wym em wa kyrchaan lane yarap ya oo neibhah u wanrah ya kani ka Training Centre toh kawa eh la kam wa rah ya u dieñ dei kti na iwi i thaw cha iwi kamtæ da kyrpaad u ya ka sorkar kamjooh kiwa mihkhmat wow sñiawbha ki u e yarap lane u ya kynrong lang yoh u man kani ka thaw kawa neh khamtam yow yoh kaam yoh jaam ki khon khynroo khyllood kiwa em hapoh ka Meghalaya waroh.
