U MLA ka Amlarem Constituency u Lahkmen Rymbui ha ka 29 tarik u Naikhynde da saam tiar u deilang ki Certificate cha ki 90 ngut kiwa da pyndep yei chah sikai kreh mistri neibynta u chna ki yung Pradhan Mantri Awas Yojana (PMAY) ha ka yalang wa da pynman ha yung krehkaam u BDO ka Amlarem C&RD Block, deiwa emlang leh u BDO, u G. Mylliem, u Lambormi Suchen, Skill Development Officer, MSSDS, u B. Marweiñ, Director ka Jaiñtia Institute of Technology, Jowai wa kiwi.
Kini ki 90 ngut toh kiwa napoh ka Darrang wa Nongtalang Centre wa Cluster, wei da e sikai ya ki da ka Jaiñtia Institute of Technology, kawa da kyrchaan poisa da ka Meghalaya State Skill Development Society.
U Lambormi Suchen hawa klam khana u ya ki jait sikai wa e yei sap namo ki Skill waphær waphær wa ka sorkar da wanrah ko neibynta ki bru em sap khnang wa deiwa yoh laad ki u pynpliah yei sap daw ye ki u sdang kreh yei kaam.
U BDO ngait skem u wa kini ki 90 ngut wa da pyndep chah sikai u man kiwa pynmyntoi ya ka chnong ka thaw khamtam wow chna ya ki yung PMAY, neibhah ini wadep leh boon hi ki bru ki wym ye u pyndep chna smat ya ki yung PMAY deiwa e daw toh wym em mistri.
Neiliang u Lahkmen Rymbui ong u i pyndep ya kani ka e sikai wym mut wa ye u chna du ka yung PMAY tangwa ye ki leh u chna ya kiwa boonjait.
Kyntu haroh u ya ki wow pynpsiah pyrtuid ya idæ hapoh ka chnat Labour khang yow yoh myntoi ki neibynta ki khon kamjooh ya idæ.
Da ong u leh wa i wanrah ya ka Skill Meghalaya wym mut du wow yoh kreh sorkar tangwa wow ye leh u yieñ hei kjat yong i hi.
Kamtæ kyntu haroh u wow chim kabu yeiwa chah sikai wa e ka sorkar neibhah kiwon kiwon ki sikai pynkupbor ki ya kiwa da pyndep yow sñiaw skem neibynta u sdang kreh yei kaam.
Discussion about this post