Jowai: I pyndap ya ka U-DISE FORM hei rukom watoh wa biang man ko kawi na ki bynta wa kyrpang yong ki bor watoh u pait u yoo ya ki thaw purae nae ki skur. Kamtae hajrong ka thong wow man i rukom pyndap ya ka U-DISE form iwa yahap kat kam i kwah ki bor pait bor pynlai ka Ministry of Human Resource Development yong ka sorkar India, ki Block Mission Coordinator, SSA, West Jaintia Hills wa kynthup ya ka Thadlaskein, Laskein wa ka Amlarem ha kani ka tayaw dachim ki wow pynman ya ki e sikai wa kyrpang ya ki Head Teacher waya ki Principal.
Ya kani ka esikai da tip kam ka Training for Head Teachers & Principals on Students Wise Data Collection In Sync with U-DISE heiwa da sdang nyngkong ha Thadlaskein ha ka sngi Pyngkat 6 tarik u Khonchonglad, ha Amlarem Blok ha ka sngi Thymblein 7 tarik wa ha Laskein Block wan ha ka sngi Hat 8 tarik yong u Khonchonglad.
Neiliang ki Block Mission Coordinator wa toh u pait u yoo kyrpang haman ki Block yei lai bait lai ryntih i rukom pyndap ya ki U-DISE form da kyrsu kyntu joor ki ya ki Head teacher waya ki Principal wow man kiwa yakrehlang wei chim u pyndap ya iwon iwon i bynta ka UDISE dei wa tikna khnang wa ha uni u snem i rukom pyndap ya ki Form u man i iwa biang.
U Bimmi L. Suwer, District Coordinator Programmer, SSA West Jaintia Hills ha waroh kini ki esikai da man u kam uwi na ki bru chemphang wow e i klam i batai chaphang kani ka Students Data Collection In Sync with U-DISE. Hei kdar yong oo wow e ki kyntien yahkhmat haman ki thaw e sikai, da ong u wa kat nangmih ki snem i rukom pyndap ya ki Format yong ka UDISE man i iwa yoosuk deiwa ki Headteacher wa ki Pricipal sniawthooh ki u pynbait yei bakla yong ki wei yaroh u leh yei yakrehlang iwa ki bor pait bor pynlai yong ki skur e ki na ki snem cha ki snem.
Da khanna u leh wa neibynta wow pynsuk ya ki bor wa pait bor pynlai yong ki skur heiyatoh wei rukom pyndap ya ka Student Data Capture Format kamjooh ya ka UDISE ha uni u snem 2017-18, neiliang yong ki kam ki bru watoh u pait u yoo kyrpang ya kani ka bynta haman ki District yong ka jylla da pyrchang ki u leh yei wabha tam. Kamtæ da kyrsu kyntu joor u ya ki Head Teacher wa ya ki Principal yong ki thaw purae wa em ha ki kyrdan waphær waphær wow man ki kiwa bniah yei wi pa iwi i bynta hawa pyndap khnang yow lait u mih iwon iwon i bakla, i artadtien man da pyllang ya ki haman ki Block neibhah kani toh man ko kawi ki Information System wa biang tam heiwa ka sorkar India chim ko wow yaklam yeiwon yeiwon chaphang ki bynta yong i puræ puthi wei i hok ki khynnah kdar ko wow pynchongnia chong nongrim kat kam ki Data wa em ha ka U-DISE.
Discussion about this post