I yakrehlang yong ki 3 ngut ki MDC wa kynthup u MDC ka Mynsngat Khanduli, u MDC ka Barato-Mukroh, u MDC ka Saphai, neitæ ki 3 Dolloi wa kynthup ya u Dolloi ka Elaka Shiliang Myntang, u Dolloi ka Elaka Raliang, u Dolloi ka Elaka Nongjngi waka Hynñiewtrep Border Disputed Redressal Forum (HBDRF) da ye u pyndep yei kaamram u pynsñiawthooh yaki paaid wa chong chnong yong ka Elaka Labang Nangphyllut Pangam Raliang (Block-I) waki paaid wa chong chnong wa em marjan waki thaw khappood heiyatoh u pood u ang ha chnong Umshangiar (Khanduli) haka 20 tarik uni u bnai.
Ha kani ka yalang da emlang u MDC Barato-Mukroh, u Aiborlang Shadap, u MDC Mynsngat-Khanduli u Dawan Lyngdoh, u Dolloi Elaka Shiliang Myntang, u Dolloi Elaka Nongjngi, neitæ u M.M. Thaiang, Secretary Labang Nangphyllut Pangam Raliang Council (LNPC), u Chandame Sungoh, Chairman HBDRF, u Treibor R Suchen, Secretary JSU, u Lamsuk Langstang, Secretary HNYF, u Ohibait Dkhar, President KSU-Jaiñtia Hills, ki bru waheh ka thaaiñ Namdong Khanduli wa ki Waheh Chnong, Secretary Chnong waphær waphær ka thaaiñ Labang Nangphyllut waki chnong wa marjan ka thaaiñ khappood heiwa da yoh i klam pdiang na u Waheh Chnong Umshangiar, u Elias Siangshai.
U Chandame Sungoh Chairman-HBDRF da khana u hajrong i leh embor ka sorkar Assam deiwa pynpsiah yabor yaka Elaka Labang Nangphyllut wa Pangam Raliang naka Hima Khasi Jaiñtia (Meghalaya) cha ka United Cachar Mikir Hills District, Assam.
U Dawan Lyngdoh da kyntu kyrsu u yaki paaid ka thaaiñ Labang Nangphyllut Pangam Raliang wa kiwa sah haki thaaiñ khappood wow man kiwa yatylli kamjooh u yakrehlang neibynta u yoh yow pood u ang wa pura.
Neiliang ki arngut ki Dolloi, u Dolloi Elaka Nongjngi wa u Dolloi ka Elaka Shiliang Myntang leh pynsñiaw ki yei sñiawsih yei lehbor ka sorkar Assam deiwa tyngkheiñ yabor yow pood u ang ka Elaka yong ki, heiwa ong ki ka Umkhyrmi, Umlaphiah, Wanpung waka Rongkhelan naka Elaka Shiliang Myntang, ka Khliehmynlong, Langkyrcha, Sajieñ, Umpho, Lakaroi, Stonglapar naka Elaka Nongjngi wei wot ka chnong Rtiang Sanphaw, Myn-i wa Mookoiram kiwa dang hap hapoh u pood yong ka jylla Meghalaya leh dang kamtre yabor ka Assam.
U M.M. Thaiang ong u wa biang ki kot ki sla waki dulir wow pynsakhiat waka Block-I toh ka bynta yong ka Ri Khasi-Jaiñtia wei i kaamram yong ka sorkar Meghalaya-Assam heiyatoh waka Block-I toh sa du u pynuiñ biang (Re-transfer) katkam wada dep lai sylli lang daki artylli ki District Council ka United Cachar Mikir Hills waka United Khasi Jaiñtia Hills Districts haka 23-02-1958.
U Treibor R. Suchen, Secretary JSU khana u wa da dep chong yalang ki waka sorkar Meghalaya haka 15 tarik uni u bnai ha Secretariat wei da e yumut ki yaka sorkar Meghalaya wow pyrkhat sani bha hachwa u chim yei rai neibynta u pynbait yow pood u ang.
Hei klam u Lamsuk Langstang da pynsñiaw u yei sñiawkhia wa wot da boon bru leh tangwa i tip i stat, ka spah ka phaw, dang tam i ya ki. U Ohibait Dkhar ong u wa i yakrehlang u pynyoo ko yei yatylli hapyrdi ki MDC, ki Dolloi, ki seiñbhalang, ki waheh chnong wa ki bru paidbah neibynta u pood u ang.
Ki waheh waphær waphær naka thaaiñ Labang Nangphyllut Pangam Raliang da pynsñiaw ki yei eh i khoo yong ki iwa da chah lehbeiñ ki ha ki Karbi. Neitæ da iwi i sur kwah ki toh nadooh dohnood u liwan biang cha Meghalaya.
