Ka Meghalaya Bharat Scouts & Guides, West Jaiñtia Hills ha ka thong wow wanrah yei khooid i pliah ka chnong Jowai ha kani ka tayaw da pteiñ biang ko wow sdang ya ka wat wa ar i pynsñiawthooh paidbah namo ka Awareness Programme ha man ki skur wa em hapoh ka chnong Jowai.
Kani ka lai pynsñiawthooh wa da pynman toh dei yakrehlang ka Jowai Municipal Board chirrup ka District School Education Officer, West Jaiñtia Hills wei ha kani ka tayaw ha ka 21 wa ka ynne ka 22 tarik, ki Scouts Master wa Guides Captain yong ki Unit waphær da yooh kjat ki haman ki skur wow liklam pynsñiawthooh ya ki khynnah skur wa ya kiwa sikai chaphang ki bynta yong i khooid i pliah deiwa klam kyrpang ya ka rukom pynlang jhep namo ka Solid Waste Management.
Ki Scout Master wa ki Guide Captain hawa e yei klam i batai da pynkynmoo ki hapyrdi ki khynnah skur ya ki san tylli ki ‘R’ iwa mut Refuse, Repair, Recycle, Reduce, Reuse wei da kyrsu kyntu joor ki leh ya ki khynnah wow yakrehlang neibynta i khooid i pliah nadooh na yung hadooh ha lait wei wow man leh ka nongmuna wa bha ya kiwi ki para wa chong chnong.
Ki skur kiwa da booh thong u pyndep ha kani ka wat em ki kamwa 16 tylli wei ki Unit Leaders yong ka Meghalaya Bharat Scouts & Guides, West Jaintia Hills kiwa da embynta ha ini da em ki hadooh 25 ngut wa kynthup ki Scouts Master, Guides Captain wa ki Rovers-Rangers.
