Ynne i step, ki chakri niam ka Raij Jowai hei yahkhmat u Dolloi, u Pator chirup ki Soo Langdoh wa kynthup yow Langdoh Chyrmang, Langdoh Jowai, Langdoh Tuber wa u Langdoh Ialong deilang ki Phra Kur Phra Kmai wa ki waheh wasian ka Raij da lai ki cha Loom Mookhai wow pyndep ya ka kñia e ngooh e dem, e bhet e bhar wa kyrpang yow Syiem Pyrthat wa ya u Mon Ryngklaw.
Chwa wow mih na Yung Langdoh ha kani ka step, kawi na ki lehniam wa hap u pyndep toh ka Pait Tpu Niam kawa man neibynta u Dolloi, Ka Langdoh, U Langdoh waka Raij ka chnong heiwa ya kini ki le tylli ki Tpu Niam da chet kyrpang da ka Langdoh.
Nadooh wa mih na Yung Langdoh uwi na ki Wasan tymbood luti wa lai u, e u ka kbai ka kyrha, ka wyrta chula yow tip ki khon ka chnong ka Raij u ya wanlang wanbi ha Loom Mookhai.
Hakhmat ka duwan kñia, ya ka lehniam da pyndep da u Sangot Paswet dei synranlang u Sangot Pakyntein wa u Sangot Pasubon kiwa man ki pateiñ khon pateiñ ksu yong ka kur Sookpoh Khad-ar Wyrnai.
Neiliang u Wh. Puramon Kynjin, Dolloi Elaka Jowai hawa khana hajrong kani ka lehniam da ong u kam wa ki Soo Langdoh ha ka yurim i sikai niam wa da yoh pateiñ pyndep hok ki ya ki kular u Trekirot ha u Niaw Wasa yooluti u wa i suk i saiñ, i miat i bha wei roi i paar u wan i ha ka chnong ka raij kamjooh ha ka Elaka waroh kawi.
Chooh chooh kamwa i e ngooh e dem e bhet e bhar wa chisien chisnem yow Syiem Pyrthat wa yow Mon Ryngklaw, ynne man i iwa hun Blai hun Syiem dei yakrehlang ki Soo Raij Soo Langdoh ka niam rukom dustur leh u nangheh nangkrai ko deiwa ki chakri niam yong ki Soo Raij-Soo Langdoh chimkhia ki u pyndep hok yei mon i khe u Trekirot wei wow tip leh u burom u kheinkor wei wow pynkhroo yei kyrkhu wa da yoh iwa u Trekirot wa ki Blai ki Syiem e ki na ki por cha ki por.
khaddooh ya kani ka lehniam da pynkut da ka Yutang Yubat hapyrdi u Kongwasan ka Raij Chyrmang wa yieñ neibynta ki Soo Langdoh wa u Pa Dolloi ka Elaka Jowai.
![](https://i0.wp.com/wyrta.com/wp-content/uploads/2023/06/isgfh1.jpg?resize=962%2C722&ssl=1)
![](https://i0.wp.com/wyrta.com/wp-content/uploads/2023/06/isgfh5.jpg?resize=962%2C722&ssl=1)
![](https://i0.wp.com/wyrta.com/wp-content/uploads/2023/06/isgfh2.jpg?resize=962%2C722&ssl=1)
![](https://i0.wp.com/wyrta.com/wp-content/uploads/2023/06/isgfh4.jpg?resize=962%2C541&ssl=1)
![](https://i0.wp.com/wyrta.com/wp-content/uploads/2023/06/isgfh3.jpg?resize=962%2C722&ssl=1)