Mynstep ka 22 tarik man ko ka sngi wow sahkynmoo ya kiwa ngait niam Hindu heiwa daw wai paidbah noh yaka Ram Mandir ha Ayodhya, Uttar Pradesh.
Kam chibynta yong i wai ya kani ka Mandir, ynne ha Jowai kiwa ngait niam Hindu da pyndep ki yaka Kalash Yatra.
Kani ka Kalash Yatra toh wow lai diang ya ka um wow rah cha ki Mandir, heiwa ha Jowai da lai diang ya ka um ha u kchu khyndaw na Syntu Ksiar ka Wah Myntdu da ki kynthai heiwa da em i ngoohblai da u pandit.
Ya ki kynthai da synraan da ki chynrang wa rah lama chirup wa kiwa choh ya ki bom wa kiwi ki tiar tem tiar put.
Na Syntu Ksiar da mih liwan ki dei thuk-thuk wa dei kjat wei ki kynthai da rah ki ya ka um dei kjat hadooh wa poi ha Shiv Mandir wa em ha Iawmusiang, yow ye u pyndep yaka lehniam ya jar jiar ki Blai.
Hawa yaklam wa u Pawan Sanchety, u General Secretary ka Vishva Hindu Parishad, Meghalaya da ong u wa heipor wa chna ya ka Ram Mandir ha Ayodhya da dep rah leh yaka um na Wah Myntdu wa i khyndaw wow embynta ha i chna ya kani ka Mandir wei kani ka um neini wa da rah ynne toh wow pyndep yaka Puja.
Da ong u leh wa da em ki heh niam wa ki heh seiñ na Meghalaya kiwa da lai cha Ayodhya wow sakhi ya i wai yaka Ram Mandir mynstep ka sngi.
Discussion about this post