Ynne ka sngi u Montri ka chnat Health wa Sports ka jylla uwa man leh u MLA ka NPP na Jowai, u Wailadmiki Shylla da pyndep u yeiwa kular u wow su ya ka tulop wa nyngkong nadooh wa man Montri u cha ki yung wa ri ya ki khynnah khonswet ka Ri-loom Jaiñtia.
Ha kani ka sngi da em ka yalang wa tbiang ha Conference Room ka Circuit House, Jowai heiwa da pynlai ya ka yalang da u District Child Protection Officer, u Sanlang Passah wei da yoh ki kyntien pdiang burom na ka District Social Welfare Officer, ka Yosarda Najiar.
U Wailadmiki hawa e i klam da ong u wa kamwa da kular u ha ka 16 tarik u Naichiphaw 2025 heipor wa smai u kam u Montri, da kular u wa ka tulop wa nyngkong wa yoh u kam u Montri daw e yarap sñiawbha u ka cha ki thaw ri khynnah wa em hapoh Ri-loom Jaiñtia, wei ka tulop ki Montri kynjoh ko Rs. 2.04 lak iwa mut wa ki 7 tylli ki thaw ri khonswet da yoh yarap ki mar Rs. 30,000.
Da ong u wa oo leh man u kam u khonswet tangwa dei kyrkhu u Blai da jied ya oo kam u MLA wei ha kani ka kynti won da man u kam u Montri sorkar wei ymye u wow su kylliang ya u Blai katwa kamtæ kawi na ki laad toh wow e yarap ya ki khynnah wa emkaam yarap sakhiat.
Chooh chooh da ong u wa ynne da dap u dei kmen wa da ye u wow pyndep yeiwa da kular u wei hanla man i e wa khian tangwa i e man i neibynta i bha i miat wei angnood u wow yarap ya kiwi ki thaw leh kamjooh ha ka jylla tangwa kam kiwa mihkhmat hap pyndap ki leh yeiwa emkaam kiwi tawon ki bru leh. Da kular u leh ya kini ki thaw ri khynnah wa lada emkaam ki iwon iwon neini chaphrang neiliang yong oo da man uwa smat wow yarap ya ki.
Ha kani ka sngi da em 7 tylli ki yung ri khynnah kiwa da yoh yarap na u Wailadmiki Shylla kitæ:
1. Ka Children’s Home (Girls), Mihmyntdu, Jowai (wa pynlai da ka sorkar)
2. Ka Children’s Home (Boys), Chutwakhu, Jowai (wa pynlai da ka sorkar)
3. Ka Khasi Jaintia Presbyterian Synod Mihngi, Children’s Home (Girls), Wahiajer (wa pynlai da ka NGO diewa kyrchaan poisa ka sorkar)
4. NEIMA Orphanage Home (Girls), Sahsniang (wa pynlai da ka NGO)
5. NEIMA Orphanage Home (Boys), Sahsniang (wa pynlai da ka NGO)
6. World Mission Children’s Home (Girls), Nartiang (wa pynlai da ka NGO)
7. Specialized Adoption Agency, Caroline Colony, Jowai (wa pynlai da ka sorkar)
Neiliang kiwa pynlai ya kini ki thaw da kitbok ki ya u Wailadmiki wow nang yoh u yei doh i pran wa khlan wei wow ye chooh u wow chakri ya ki paidbah ka Constituency, ka Ri-loom Jaiñtia wa ka jylla leh waroh kawi.
Discussion about this post