Ka Dorbar Ki Waheh Kur Ri Jaiñtia, ynnin ka sngi da pynman ko ya ka yalang paidbah ha yungwalieh ka Chiliangraij, Jowai yow pynsñiaw yei dawa yong ka wow tipmit noh ya ki kur wa ki dorbar kur kam chibynta wow yada yei e kulmar ya ki ST Certificate yow pyntikna leh kiwa yoh toh du kiwa chim dei kur ka bei wei ymtoh leh da i yong u pa wei kamjooh da i kur ka men namo ka bei u pa.
Hadien wa da yoh yei klam na ki bru chemphang kam na ka Dr. Waisa Sumer, u Dr. H.H Mohrmen, u Adv. Erwin K Sutnga, u R.L. Kharpran, Acting President Synjuk Rangbah Kur Bri Hynñiewtrep (Seng Kmie), u R.R. Makdoh, President Synjuk Rangbah Kur, Ri Bhoi wa kiwi de da chim ya kini ki rai ha wah:
Yow dawa tipmit ya ki Kur wa ki Dorbar Kur deiwa e por chi bnai ya ka JHADC yow pynmih ko ya ka Executive Order katkam ki AD Rule ka Council.
Heiyatoh wa ki Schedule Tribe Certificate, ka JHADC toh u tipmit ko ya ki Waheh Kur wa da jied wei da yoo biang da ki Dorbar Kur ki wow e ya ka Clan Certificate ka wow man kam ka NOC ya kiwa lai paan ST Certificate hadien wa da pyntikna toh wa i kur toh i yong ka bei.
Ini mut i wa du hadien wa wanrah ya ka Clan Certificate u ye u DC wow e ya ka ST Certificate.
Sa iwi i dawa toh wow pyndooh noh ya i kyntien “Synteng” iwa mut wa em ki jaitbru Synteng kamjooh leh yow pyndooh noh ya ki jaitbru Kuki, Zo kam kiwa em hapoh Ri-loom Jaiñtia kiwa da em pyrtuid hapoh ka ST Order 1950.
Da rai leh wow dawa na u Prime Minister ka India lyngba u CEM ka JHADC wa na u Chief Minister ka Meghalaya wow pyndooh noh ya i kyntien “Synteng” namo kitæ ki jaitbru Synteng wa ya ka jaitbru Kuki, Zo na ka ST Order 1950 wa kiwi neibhah kini ki jaitbru ym em ki hapoh Ri-loom Jaiñtia.
Discussion about this post