Ka sorkar India da pynkylla ko ya ki kyndon ka aiñ Central Excise Act yow pynduna noh ya ka dan wa da kheiñ neibynta i Petrol wa Diesel.
Neibynta i Petrol da pynhiar noh na Rs. 13 chi litre cha Rs. 3 chi litre katwa yei Diesel da pynhiar na Rs. 10 chi litre cha nod.
Kini ki dor thymme toh kiwa krehkaam chisiendon.
Neiliang u Minister ka Petroleum and Natural Gas, u Hardeep Singh Puri da ong u wa i long i man ha ka pyrthai toh kawa dang hap wow paitbniah bha wei neiliang ka sorkar da yaleh ko wow leh yow lait u thut i poi i phniang wa kiwi de ki mar wa emkaam.
Da ong u leh wa i dor i Crude Oil da ku i na $70 chi Barrel cha $122 chi Barrel wei ha waroh ki ri ka pyrthai da pynku yei dor phniang khamtam ha ka thaaiñ South East Asia heiwa i dor da ku da 30%-50%, ha ki ri ka North America da ku da 30%, ha Europe da 20% wa 50% ha ki ri ka Africa.
Tangwa ka sorkar India da rai ko wow kit da ka yeini i ku dor yow lait ki paidbah u chah ktah wei ha kini ki soo snem wa da lai nadooh wa sdang ka thma Russia-Ukraine ka sorkar da bakhlieh ko yow pynlut neibynta ki paidbah.
Chooh chooh da ong u wa ka sorkar dooh nong bha ko da Rs. 20 chi litre i Petrol wa Rs. 30 chi litre i Diesel.
Ha kam kini ki por da kyntu u leh ya ki paidbah wym toh u ngait ya ki khubor thok wei wym toh u hær rngu ki.
Discussion about this post