Pyneh bok eh nasib ia ki khynnah khynroo wa da pyndep ia ka esikai wa ar bnai yow pynkhreh ki ha ki eksamin Bank wa ki Insurance

Jowai: Ynne ka sngi da pynkut ia ka kani ka ‘Free Career Training & Career Counselling Programme on Clerical Examinations for State Government/ Central Government, Bank and Insurance Sector’ kawa sdang nadooh ka 13 tarik u Naiynniaw.

Da wan pynchlur ia kini ki 13 ngut ki khynroo da u ma B.J. Kharshandi MCS, West Jaintia Hills District dei wa ong u wa toh u pyrchang ki neini cha khmat u ialeh ia ki eksam wa boonjait, ham ieh u sep-ai waroh i tip wa da ioh phi ha kini ki ar bnai. Ong u wa dei wa wan ki cha kani ka esikai pynyoo wa rai ki u jied ia kini ki jait kaam ha ki bank wa ki company insurance. Kini ki artylli ki jait kreh toh kiwa heh wa san ha Ri India kiwa ye u pynku ia ka ri waroh kawi. Pynkut u dei wa ong ymtoh i bakla u em i thrang ha i jingim ham e u sep-ai itæ i thrang phi.

Ha i iaklam wa u H. H. Mohrmen u wa man kam u president ka sein Society for Urban & Rural Empowerment (SURE) kawa pynlai ia kani ka esikai da ong u wa hawa sdang ia kani ka esikai ki bor district da phah ki 25 ngut ki bru cha kani ka esikai. Boon na kini hap ieh ki chiteiñ neidaw wa ym ye ki u iabeh por u wan cha kani ka esikai. Da em ki klas ha i step nadooh 7 waje hadooh 9 waje wa i janmiet 5 waje hadooh 8 waje, nadooh ka sngi Nyngkong hadooh ka sngi Thohdein. Ong u leh wa da dep thap pyrtuit ia ki waroh ha ka Institute of Banking Personnel Selection (IBPS) iow ialeh ki ia eksam wa daw pynman ko ha kini ki bnai wa daw wan.

Ha kani ka esikai da em 10 ngut kiwa na ki bank waphær waphær wa wan esikai ia ki buit ki budia wa kamon u leh ki yow ye ki u pyndep smat ia ki eksam. Kamjooh leh da dep pynleh eksam pyrchang (mock test) ia waroh ki wa chah sikai wei da leh ia ka mock interview yow sniawthooh ki haroh kammon u jubab man da thooh kreh.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ha kani ka esikai da pynkhreh ia kini khynroo ha ki phang kam ka Quantitative Aptitude, ka English, General Awareness wa ka Logical Reasoning.

Ynne ka sngi da sam makna leh ki kot ki sla cha kini kiwa em bynta ha kani ka esikai.

Kiwa wan chah sikai toh nadooh kiwa da dep Engineer, MBA wa kiwa da dep Phd leh.

Ya kani ka e-sikai da bah khlieh da ka District Administration hapoh ka skim Chief Minister Career Guidance Scheme.