Ka Dong Lummajar Club Nartiang, West Jaiñtia Hills District lyngba i kyrchan poisa ka Yess! Meghalaya hapoh ka Environmental Protection and Conservation Programme, da kynmoo burom ko yaka sngi yada bei rym-aw ynnin ka sngi deiwa pynman i yalehke Drama wa tbian kamjooh i dro dur iwa yatoh wa kani ka sngi kyrpang namo ka World Environment Day.
Ha ini i lehkmen da chimbyntalang da waroh ki khon ka dong kamjooh ki khynnah skur yong ka Ramakrishna Mission Secondary School Nartiang, ka Tipsngi Upper Primary School Nartiang wa kiwa sikai.
Haka yalang tbian wa pynlai da u President ka Dong Lummajar, u Nidaioh Myria, da yoh i kyntien pdiang burom na u Secretary yong ka dong, u Yiang Maskut uwa da khana leh wa ka Yess! Meghalaya toh kawa da mang neibynta ki khon khynroo khyllood ka jylla wada pynlait da u Montri Rangbah ka jylla u Conrad Sangma.
Da kyntu kyrsu u leh ya ki Youth Club waphær waphær u kreh chitom ki neibynta u pynneh pynsah yaka bei rym-aw.
U Principal ka R.K. Mission Secondary School, u S. Bhoi hawa e yei sneiñ i kyntu da pynrap haroh u yei emkaam i lehkhooid hapoh ka chnong ka thaw khnang yow yoh yei chait i khiah.
U Sati Suwer, Secretary ka chnong Nartiang pyllun da yaroh u yaka Dong Lummajar wa da pynman ko kam kani ka jait yalang kawa man ka nongmuna ya kiwi won ki dong ha ki por wa chakhmat.
Ya ka yalang ha kani ka sngi da pynkut dei kyntien e khublei na kawa sikai skur, ka Nidaioh Maskut kawa da e khublei ya u Montri Rangbah ka jylla u Conrad K Sangma kamjooh ya kiwa sikai, ki khynnah skur wa ki paidbah khamtam ya ki khynroo khyllood ka chong waroh kawi.
