Jowai: Kam chibynta wow pynem warom ya ka sngi wa kyntang yong ka Bei Rymaw chirup wa ki ri yong ka pyrthai wa kammon u yada chooh chooh ya ka wa ki soo dong soo kun yong, ka skur Ladmukhla UP School leh da sdang ko ya ka program chirup waki khynnah skur.
Da sdang ya ka sngi dei khlai ya ki kyntien kular næ ka Pledge heiwa uwi pa uwi toh i kaamram wow yada ya ka Bei Rymaw yow man ko kawa khooid wa jngiar nadooh na yung na sem hapoh chnong poh thaw kamjooh leh ha ki thaw puræ yow yoh yei chait yei khiah wa kongsan tam hei rta yong i ki bru.
Hadien ini hapoh i yahkhmat u Headmaster u ES Bang da sdang won da i thung dieñ ha waroh ki soo dong soo kun yong ka skur wei wow sumaar bha ya kini ki dieñ man ka sngi.
Ha kani ka sngi da thung kamwa 50 tre dei yarap yong ka tnat Social Forestry wa em hajan ka nan Thadlaskeiñ wow saam cha kiwi tawan ki skur wa thung dieñ ha kani ka sngi.
Da yoh leh i kyntu kynpham ya ki khynnah skur na u wa sikai u Kyllimot Lhuid deiwa ong wa emkaam u yada i man ka sngi dei wow leh khooid i nadooh na yung hadooh hapoh chnong poh thaw kamjooh chirup wa i yakreh lang ka chnong waroh kawi khnang wa i thmu wa bha yow jop i ki, wei kamjooh leh da e khublei u ya ka tnat wa da yarap ko u e dieñ wei ya waroh kiwa sikai wada ya chim bynta deilang wa ki khynnah skur da man ko kawa jop.
Discussion about this post