Jowai: Ka Women’s Welfare Organization Seiñraij Jowai kam chibynta u yasnoh kti lang waka ri waroh kawi ya ka sngi ki khynnah haka 14 tarik ka wa man leh ka sngi kha yong u Prime Minister wa nyngkong ka Ri India u Jawaharlal Neru, kani ka seiñ leh da pynem burom ko ya ki 29 ngut ki khynnah yong ka crèche kiwa jooh peit jooh sumar ki man ka sngi.
Ya kani ka sngi pynemwarom da pynman ha ka ophis yong ka Seiñ Raij Jowai ka wa em ha Iongpiah heiwa ya ka yalang da pynlai da ka kong Hima Lakiang ka dkhot ka Women’s Welfare Organization. U ma Samdakiyo Shullai Range Forest Officer da man u kam u kongsan hei ya emlang ka kong Rily Sumer, ki bei ki pa ki khynnah wa kiwi.
U kongsan hawa e yei klam pynpaw u yei kmen wow yoh u yalehkmen lang waki khynnah, ong u ki khynnah emkaam ki i burom naki waheh, emkaam ki i yada yow lait ki nei sih i roi, ong haroh u wa u ngooh Blai i deiwa kynmoo warom leh ya ki pli kitu ki khynnah kiwa em ha pyrdi i kjut i sam, kiwa em ha pyrdi i chahlehbeiñ, kiwa em ha i pyrdi chah pynkreh wow yoh ki yei kmen i sñiawbha .
Ha kani ka sngi da pynkmen pynka-it ya ki khynnah dei chad i rwai, wei da e lad leh ya ki khynnah wow ah ki ya u cake wa kyrpang nei bynta yong ki, heiwa da yoo wa ki khynnah leh da kmen ki yei pynka-it kani ka seiñ manbei ya ki.
Da em leh i e sñiawbha u kongsan cha arngut ki nongpait nongsumar ya kini ki khynnah hei por sngi, kamjooh leh da e sñiawbha u leh cha waroh ki khynnah.
Da pynkut ya kani ka pynemwarom da ka ngooh ka dem wada e da u pator u ma Raymond Nartiang weikyntien e khublei naka Kongka Laloo.
Discussion about this post