Ka Sarot I Man kawa man kam ka dhab ki 11 ngut chi lok wa em i thmu na ki por cha ki por deiwa kreh hei wow yarap ya kiwa emkaam ha ka imlang sahlang, da jooh pynman ko leh yei e snaam sñiawbha na ki snem cha ki snem.
Ynne ka 4 tarik kam chibynta wow pynemwarom ya ka World Environment Day yong uni u snem kawa daw pynman ha ka 5 tarik kamwa jooh man hi, neiliang ki dkhot ka Sarot I Man da lai thung ko ya ki tre dieñ cha ki bynta ka Treriat ka Kiang kawa em hapoh u pood u ang ka chnong Panaliar, Jowai.
Ha chwa wow sdang thung ya ki tre dieñ, da em ka yalang tbian wa pynlai da u Shape Pasweth, u dkhot ka Sarot I Man. Da yoh ya ki kyntien ngoohblai na u Kyllimot Lhuid wa ki kyntien e khublei na u Sienmitre Sumer uwa da e khublei kyrpang haroh u ya u sahep Taiwanyoo War, District Soil Conservation Officer (Territorial Division), West Jaiñtia Hills District, uwa da e ya ki tre dieñ wow yoh u thung.
Da yoh ya i klam pdeiñ da u Riquoma Rq. Laloo, u wa da ong wa ki warim yong i nachwa, khlem da puræ datip ya ka sayan, ki da tip chwa ki yi wow jia ya ka mynried lym tip u pynneh pynsah ya ki dieñ ki siej wa ki um ki wah. Da ong chooh chooh u, wa ileh ki warim pynemkaam ki ya i kyntien sang, yoh u man ki khloo næ ki um wa kyntang, toh neidaw wa kwah ki wa kitai ki thaw u man ki kiwa yoosuk wei wow neh rata. Katni sngi ka pyrthai dang ini tip ki wa kammon u burom ya ka rym-aw wa ki tawiar soodong yong ka, deiwa pynman ya kini ki kaam wow ya thung dieñ. Kyntu u ya waroh ki dkhot ka Sarot I Man wow pynneh ki ya ini i mynsien ya maya yong ki, hei wow li yarap ya kiwa emkaam ha ka imlang sahlang, wei heijooh i por yei mynsien maya ya ka rym-aw, deiwa ong u wa ym hoi u kut du ha kini donhi ki kaam, “E wa kani u man ko ka nongmuna ya kiwi yoh ki u tip wa kammon u yajan wei wow maya ya kiwa im wa khih ha ka tawiar soodong yong i.”
Neiliang u Chairman, u Shape Pasweth da khana u wa katni hapoh ka pyrthai hi waroh kawi, khamtam hapoh ka ri India yong i, da em hei maa wa da duna ka la-ær wa khooid, kamtæ khut u ya waroh wow tip u syndong ya ki dieñ wa dadep thung, dei wym hoi u leh pynsih ki wa lai wa wan ya ki.
