Khliehriat : Ka ophis yong ka Superintendent of Fisheries East Jaintia Hills District haka 10 tarik u bnai da pynman ko yaka Aqua fest wa nyngkong haka District kawa da tip kam ka “1st District Aqua Fest” ha pchem yong ka Community Hall ha Khliehriat East.
I thmu iong kani ka Aqua Fest toh yow pynman yaka tnat Fisheries kam kawi na ka tnat krehkaam kawa emkaam bha hapoh ka Distrik waka Jylla hi waroh kawi wei man ko leh chibynta u pynneh pynsah yaki um ki wah waki doh um.
“Ka sorkar dei yoo jngai sdang ko yaka Aquaculture Mission nadooh u snem 2012 neibhah ha kani ka Jylla katkam i yoo wa ki bru sñiawbang bha ki u baam dakha katwa i pynmih won duna i” ong ka Superintendent of Fisheries East Jaintia Hills District kong P.Phawa.
Da ong ko leh neibhah da yoo wa ki dakha wa wan cha ka Jylla yong i toh kiwa na bar, han lada em nongri dakha leh, tangwa ym ye won ki u pynmih boon ki dakha neibhah tang cha ki yaw wajan tam leh ym pu em wa dai.
Kamtæ neiliang ka sorkar dei thmu u pynchlur ya ki bru ka Jylla wow chim khia ki ya ka kaam ri dakha kam kawi naki lad kamai jakpoh wow yieñ pna yong i dahi ki kjat, da thooh ko ki laad ki luti u e yarap ya ki bru lyngba ki skhim wapher wapher kam ki kran ki subsidy wa kiwi kiwi.
Da ban chooh chooh ko deiwa ong ha kani ka Aquaculture Mission em kiwi won ki mat krehkaam kam i pynheh pynkmai ya ki nan dakha khnang yow ye u pynmih boon ki dakha na ka thaiñ dei wym em kaam de u chaniah nabar, kamjooh ka sorkar e yarap ko u chna ya ki thaw pynmih symbe dakha.
Ha kani ka sngi ki nongklam da kyntu kyrsu ki ya ki nongwan chim bynta u chimkhia ki yaka kam psan dakha. Chisien wa da psan emkaam u e baam yow heh u kmai ki wei u ye u pynlai yaw, ym toh u psan du kat u pynwyrngia hi eh i.
Kiwa e leh yei klam ha kani ka sngi na ma Justine Dkhar MLA ka thaiñ, uwa da man kam u kongsan, u Deputy Commissioner ka East Jaintia u ma W.Lyngdoh, Branch Manager Co-Op Apex Bank Khliehriat branch u ma W.Biam, Vice Chairman Meghalaya State Aquaculture Mission ka sorkar Jylla u ma G.Sten wa kiwi.
Da sam leh ya ki khusnam cha arngut ki nongpsan dakha kiwa rap stad wei wa em ki leh i thaw psan wa biang hapoh ka District, kitæ toh ka kong Pynkhreh Rymbai na ka chnong Rymbai waka Elizabet Darnei wa na Saibung Block.
Da em leh ka yaw yadai yathied ha kani ka jooh ka thaw wa da chim bynta da ka tnat District Vety & Animal Husbandry Khliehriat, ka tnat Superintendent of fisheries West Jaintia Hills District, ka District Sericulture Khliehriat, ki bru samen heiwa dai iaki dakha wa dang dep tong na nan (Fresh fish), i dai yaki wasyang (smoke fish), ki ktung (dry fish) ki achar wa kiwi.
Kani ka Aqua Fest mut ko leh kawi ka mat krehkaam wa em hapoh ka Aquaculture mission kawa man kam ka kynja awareness prokram ka wow pynpsiah hei thij i pyrkhat ki bru hei kaam psan dakha natlor ki kaam ri masi ri blang wa kiwi.
Discussion about this post