Jowai : Ka International Day of Persons with Disability Day namo ka sngi yong kitu kiwa em i duna ha i doh i pran kamjooh leh ha i jabieñ ynne ka sngi da leh burom ya ki da ka ophis ka District Welfare Officer ka distrik ha Yung Walieh ka Dulong.
Ka District Welfare Officer ka kong Z.J. Lyngdoh hei klam lam phrang yong ka da khynna ko wa em san jait ki duna ha i doh i pran ki bru kitæ i duna ki kti ki kjat, i duna ha ki khmat, ki chkor, i klam wa ha i pyrkhat pyrdaiñ.
Hapoh ka distrik West Jaintia Hills du hapoh Block Thadlaskein em 800 ngut kiwa em i duna weiwa 724 ngut na ki kiwa em ya ka ‘Disability Certificate’. Ha Laskein Block won em 675 ngut wei 543 toh kiwa em certificate katwa ha Amlarem Block won em 587 ngut na kini 548 ngut toh ki wa em certificate.
Na i ki duna wa boon jait wa boon dooh toh kiwa duna ha ki khmat pynbood sa ki wa duna ha ki kti ki kjat.
Ya ki wa duna wa boon jait da em leh artylli ki aiñ ki wow yarap ya ki, wei kitæ toh ka Person With Disabilities Act 1995, wa ka National Trust Act 1999.
Kamjooh leh ya kiwa ye u kreh ha ki kaam sorkar da booh bhah leh (reservation) 3% ya ki, da em leh 31 tylli ki post du neibynta yong ki donhi.
Yow suk ki hei lai i wan ha kiwa boon ki thaw nadooh ki skur hadooh ki ophis ka sorkar leh da e hukum ko yow chna ya ki ramp wa ki lift yow yarap ya kiwa duna wow pynemkaam ki. Kamjooh ya ki bru wa duna ki khmat leh toh u pynbiang ya ki kot Braille ha ki skur.
Katwa ya ki wa em 59 snem cha neiñ ye ki yoh ya ka Disability Pension ka skim Indira Gandhi National Disabled Pension Scheme.
Ya kitu ki wa kwah u seiñ khih ye ki u yoh ya ki ram na ka National Handicapped Finance and Development Corporation.
Ka Dr. J.V. Shullai M&HO ka District Early Intervention Center ka wa da wan eksamin ya kiwa boon ki wa wan ha kani ka yalang da ong ko wa mih ki khonboo ki wa em i duna neidaw wa ym em biang i baam ka bei heipor wa dang punkhon, em ki por wa smat u kha khon hapoh ka 18 snem i rta kamjooh i yoh khon hadien 35 snem wa i ya chong kurim wa kiwa dang yajan kur jan jait.
Ha kani ka sngi ki khynnah da yoh ki u ya chimbynta ha ki wa boon jait ki yaleh ke kam i yakob put balloon, ya pass ball, rwai pyllah wa i ya knieh chuki.
Da saam ya ki prize cha ki wa jop da u Kongsan u ma Moonlight Pariat wa u Waheh Chnong ka Dulong u ma D. Dkhar.
Da yoh leh ynne ka sngi yei rwai na ki le ngut chi payu kiwa em i duna ha ki khmat na ka chnong Panaliar, Jowai kitæ Yooki Laloo and Brothers. Heijooh i por da em leh i rwai wa i chaad na ka Mother Elizabeth School for Visually Impaired, Nangbah.
Hei yakob rwai da jop da u Riphio Talang, wa ar won ka Riwan Mukhim katwa hei wa le u Clarified Dkhar.
Hei yakob put balun da jop da ka Juliana Lyngdoh, wa ar won u Sumarphio Bhoi wa le won ka Ongphi Dkhar.
I pass ball da yoh da ka Sofia Chadong, wa ar ka Beautiful Lamare wa le won ka Paskha Mary Shadap.
Hei yakob yaknieh chuki (Musical Chair) da jop u Manbha Challam, wa ar u Kitmi Lhuid wa le won ka Dakahi Kyndait.
Discussion about this post