Pynhaap pyrda ka Mawdieja S&CC, Sohryngkham ya ka lehkmen dap 30 snem

Ka Mawdieja Sports and Cultural Club (MS&CC), Sohryngkham ha ka 13 tarik da pynhaap pyrda ko ya ka lehkmen 30 snem yong ka wei kamjooh ya ka lympung yalehke bol wa da pynsah naam ya u (L) Lastkingroy Warkhyllew, uwa man uwi na kiwa yalehke bol na ka Club wa na ka chnong Sohryngkham uwa jooh leh boon ki kaam yow pynku ya ki kaam yalehke ha katai ka thaaiñ, uwa da khlaad noh ha i jia tyrrah kari ha u snem 2019.

Ha kani ka sngi, u Pynïaid Sing Syiem, MDC ka Sohryngkham uwa man leh u Chairman ka Khasi Hills Autonomous District Council (KHADC) da wan u wow ya emlang kam u kongsan. Ha kani ka janmiet da pynlait paidbah leh ya ka ‘Thup Sahkynmoo’ (Souvenir) yong ka MS&CC heiwa da pynman ya ki yalehke wa ki yakob yalehke waphær waphær.

Ya ka yalang pynhaap pyrda yei dap 30 snem wei kamjooh ya ka lympung yalehke da pynman ha Mawdngong Mini Stadium, Mawdieja wa em ha ka chnong Sohryngkham. Ha kani ka sngi da saam ya ki khusnaam cha kiwa jop ha ki yalehke waphær waphær, i pynkup burom ya kiwa ha yung u (L) Lastkingroy Warkhyllew, kamjooh ya kiwa noh kyllooid, kiwa e sñiawbha da i thaw wow chna ya ka madan yalehke wa kiwi kiwi de.

Ha ka yalehke Final yong ka lympung 1st (L) Lastkingroy Warkhyllew Memorial FT, ka Mawlyndep FC da rah ko yei naam jop deiwa pynrem ya ka Combined FC da 3-2 kol. Ha ka kylla step, ka Combined FC da thap chwa ko ya ka kool wa nyngkong yeiwa da su kylliang ka Mawlyndep FC yow pynman yaka yakhun ha ka kylla step wow kut ko da 1-1.

Ha ka kylla miet, ka Mawlyndep FC da yoh ko wow thap sa 2 kol katwa ka Combined FC da yoh ko wow pynuiñ chi kol ha chwa wa poi ka yalehke cha wakut. Ka Mawlyndep FC da yoh khur ko ya ka song poisa ba T. 30,000 wa ka Trophy katwa ka Combined FC da yoh khur ko ya ka song poisa wa T. 15,000.

Related posts

Psiah Quarter ka Lumkhangdong Kyndongtuber wa ka YW Iooksi ha ka 3rd Division ka WJDSA

September 15, 2025

Jop ka Niriang ha ka Super Division ka TSA

September 15, 2025

Ya kani ka pynhaap pyrda wa ka lehkmen dap 30 snem wei kamjooh ya ka lympung yalehbol da toh wow pyndep ha u snem 2020 tangwa na ki daw wa em ka khlam COVID-19 da hap wow sangeh wei da ye u pyndep dang ha ini.

U Pynïaid Sing Syiem da saam u ya ki khusnaam cha ki kynhun yalehke kiwa da poi cha ka Final wei ha i klam da kyntu u yaki khynroo wow man ki kiwa minot wow leh bha wei wow sai ya ki sap ha ki yalehke waphær waphær.