Ka skur Tpep Pale Government L.P. School, Jowai ha ka 12 tarik uni u bani da pynhaap pyrda ko yei lehkmen dap 50 snem ka skur ha ka yalang wa da pynman ha yungwalieh ka Dorbar Chnong Tpep Pale, hei sakhi lang ki waheh wasian ka chnong Tpep Pale, ki bei ki pa yong ki khynnah skur najrong kiwa chah khut sñiawbha, katwa u Awhai Andrew Shullai, MDC Jowai Central da man u kam u kongsan wa ka C. Lyngdoh, Asst. District Adult, Education Officer, West Jaiñtia Hills District kam ka symbood kongsan.
Ha ka yalang wa pynlai da u R.S. Teron, Headmaster ka Tpep Pale Secondary School, da yoh i klam pdiang naka S. Pakma, Head Teacher Tpep Pale Govt. L.P. School, i klam na u waheh chnong ka Tpep Pale, u Heibor Syngkon, na ka School Managing Committee wa kiwi.
Ka C. Lyngdoh hawa klam pynsñiaw ko i kmen wow yoh u emlang ha kani ka sngi pynkut yei lehkmen dap 50 snem ka skur, deiwa ong leh kani ka sngi man ko ka wow sah kynmoo ya kiyi kiyi wa dadep.
“50 tylli ki snem wa lai luti ka skur, pynyoo da em chiboon i parom yong ka ha ka luti wa eh wa khor næ iwa kmen. Wei lada em iwon iwon wa leh iwa ye u pynkmen ya kiwi ha ki rukom waphær waphær toh u pteiñ wow leh yeini, tangwa lada em won ka luti wa lai bakla wa pynsihlet e u man ko kam i sneiñ yow tip u lehbha chaphrang,” da ong ka C. Lyngdoh.
Neitæ heiyatoh i ye u kaap 50 tylli ki snem, yooluti ko wa neini chakhmat u jop chooh chooh kani ka skur yeiwa da mut da mang.
Neiliang u kongsan, u Andrew Shullai da ong u wa kani ka sngi pynkynmoo ko leh ya ki waheh wasian wa da seiñ da sdang ya kani ka skur, wei kam ki bor pait bor pynlai ka skur nadooh kiwa sikai kamjooh toh u em ki ka mynsien maya wei lehbha, neibhah du kani donhi ka luti wa ye u pynlai bait lynter ya ka skur.
Kamtæ i poi kani ka skur hadooh uni u moomer leh ngait skem u wa toh dei em i mynsien ya maya wei yakrehlang, iwa oo kam uwa mihkhmat na kani ka thaaiñ leh yoo u yeitæ.
Booh u leh i kyntu wym wow sikai ya ki khynnah du yow stat hei puræ puthi tangwa wot u tip u sñiawthooh ki leh ya ka imlang sahlang dei wow em haroh i bahkhlieh ha ka imlang sahlang.
Da pynrap u wa khamtam haka juk katni wa neidaw ka Social Media da boon ki wym em de jan cha ka imlang sahlang wot wa kiwa ha-yung ha-sem hanla em chirup hapoh yung.
U Andrew da pynlait paidbah haroh u ya ka Souvenir yong ka skur.
Da pynchongchit ya kani ka sngi da i rwai i chaad wa da chimbynta da ki khynnah skur.
Discussion about this post