Jowai: U Dr. Mukul M. Sangma ha kani ka 29 Naitung da wan pynhaap pyrda u ya ka yalehke Football ha Pdengshakap kawa da tip kam ka 4th Secondary School Invitation Football Tournament 2016-2017.
Ya kani ka lympung da pyllai da ka Dorbar Chnong Pdengshakap kawa haap hapoh ka Amlarem Civil Sub-Division West Jaiñtia Hills District.
Yaka yalang ha kani ka sngi da pyllai da u Stephanson Mukhim, MLA ka thaiñ heiwa u Dr. Mukul M. Sangma da man u kam u kongsan, hei emlang u Lahkmen Rymbui u MLA warim, u Lamdibok Sumer MDC ka thaiñ, ka Isawanda Laloo SDO Amlarem, u DC ka West Jaiñtia R. Rapthap, u SP ka District u R. Muthu wa kiwi kiwi.
U Secretary ka School Managing Committee Pdengshakap A. Kassar da khana u wa ya kani ka lympung da sdang ka chnong u pynman nadooh u snem 2010 hajrong ka thong kyntu ya ka yarong poisa neibynta i emkaam ka skur chnong kawa da seiñ ha u snem 2007 neibhah ym em u yoh yarap poisa ko neiwon neiwon lait du naka bai skur ki khynnah wa kani ka lympung.
U Dr. Mukul M. Sangma hei klam yong oo ong u, waroh tip i waka Jylla Meghalaya toh kawa ku bha hei yalehke football wei ka Jylla man ko leh katæ ka jylla wa tipmit yaka lyngba kani ka jiat yalehke.
“Sñiaw sarom O wa kat ka ri wa boon bru dooh ym em u yoh ko u yalehke World Cup, kamtæ lyngba kam kini ki lympung ka jylla Meghalaya daw pynmih daw jied ko ki wa yalehke neibynta ka Ri ki wow yachimbynta haka World Cup wei kani toh ka thong yong ka sorkar.” da ong u Mukul Sangma.
Da pyntip u leh wa ym slem de daw sdang ya ka Mission Football neibynta u e sikai yaki khon khynroo khyllood cha ki thaiñ nongkyndong kam ki Grass Root Level.
Hei yatoh won wei kyrpaad yarap ka skur da kyntu u ya ki wow pynbiang ki ya ki kot ki sla wei da kular u leh wow yarap hadooh T. 10 lak neibynta u chna yaka yung skur wa pura dei khyndawbilat.
Hawa kyruiñ won cha ka yakhun Final hapyrdi ka Nohron SC pyrchah ya ka Amlanai Young Boys ka yaleh man ko kawa yoosuk wei pynchong chit ya kiwa paitke tangwa hawa kut da jop ka Amlanai Young Boys da 3-0.
Also Read: Paan yarap ka Pdengshakap na u Mukul hei yatoh wa ka skur wa pyllai ka chnong
Discussion about this post