Shillong: U kyrtong MP ka United Democratic Party (UDP) na Shillong Lok Sabha Parliamentary Constituency ha kani ka Election wa dang dep, u Jemino Mawthoh da ong u wa ka Congress Party heipor Election pynheh ko yaka Citizenship Amendment Bill (CAB), i khang wow pynyap masi wa ki aiñ pyrchah wow kylla niam (Anti-Conversion Law).
“Katni won kiaw ne hadien wa kut ka Election,” da ong u Mawthoh.
U kyrtong ka UDP da rem u da 1.52 lak Vote ha u kyrtong ka Congress u Vincent H Pala, wei u Mawthoh da pynbaad u wa ka Congress nadooh u snem 1947 kyrchaan ko wow man tre ri India ki Hindu wa chah pynchitom ha Bangladesh wa Pakistan.
Katkam i ong u wa nadooh u montri rangbahdooh warim ka ri u Manmohan Singh wa u montri rangbah warim ka Assam u Tarun Gogoi leh kyrchaan ki ya ini i jooh.
U Mawthoh da kdaw u leh wa i khang wow pynyap masi toh wa da sdang nyngkong daka Congress Prime Minister ka (L) Indira Gandhi ha u snem 1982 hawa phah ko ya ki 14 tylli ki jylla hapoh ka ri wow pynkrehkaam ya kani ka aiñ. Da ong u leh wa ka Anti Conversion Bill da wanrah nyngkong ha Himachal Pradesh ha u snem 2007 heipor waka Congress em ko hei bor.
U Mawthoh da ong u ya ini waroh hadien wa ka Congress da pynbaad ko waka UDP man ko chibynta waka BJP.
Da ong u wa ki paidbah emkaam wow sñiawthooh ki ya ini wei ym toh u chah yah bakla ki haka Congress.
Da pdiang u leh wa i yalap Election ka Congress hajrong ka CAB da yah ko ya kiwa boon wow dam u thap cha ki seiñ saiñ hima ri-loom.
“Ka CAB ym toh du i kaam ka BJP samen wei man ko leh yong ka Congress, tangwa neidaw wa duna i por ym yoh wow pynche paidbah ya ini,” da ong u Mawthoh.
Discussion about this post