Hadien wa da pyn-eh dohnood ka sorkar wym bien u yaklam chaphang ka Reservation Policy wot hapoh ka Committee kawa kynthup lang ki dkhot na waroh ki seiñ saiñpyrthai heiwa ya kani ka Committee da phah wow yaklam du yei krehkaam ka Reservation Roster System.
Tangwa hadien won wa kani ka Committee da chong yalang ko hei sien wa nyngkong ha ka 29 tarik da chem wa i yaklam leh da lai i chaphang ka Reservation Policy hapoh kani ka Committee, kamtæ neiliang ka Chairperson kani ka Committee, ka Dr. Ampareen Lyngdoh da kyrpaad ko na ka sorkar wow pynyaar yei yaklam deiwa kynthup lang ya ka Reservation Policy.
Kamtæ ynne ka sngi da pynmih hukum ka chnat Home (Political) ka sorkar Meghalaya lyngba u Lat wow pynbna thymme ya kani ka Committee wei u yaklam ko chaphang ka Reservation Roster deilang waka Reservation Policy.
Kani ka Committee toh u pynbait khaddooh ko yei pynkrehkaam ya ka Reservation Roster deilang waka Reservation Policy wei wow phah yeiwa da rai ki cha ka sorkar hapoh chi bnai nadooh wa da pynbna yeini.
Yow pyntikna wa waroh ki seiñ saiñpyrthai yoh ki wow embynta ha kani ka Committee, najrong ki dkhot wa da pynbna, da chah leh wa yah sa arngut wa ki dkhot wa da pynbna pyrtuid.
Kini ki dkhot ka Committee man ki kamni ha wah:
- Dr. M. Ampareen Lyngdoh, Law Minister kam ka Chairperson.
- U Zenith M. Sangma, AITC kam u dkhot
- U H.M. Shangpliang, BJP kam u dkhot
- U Augustine Marak, GNC kam u dkhot
- U K.P. Pangniang, HSPDP kam u dkhot
- U Ronnie V. Lyngdoh, INC kam u dkhot
- U Pyndapborthiaw Saibon, KHNAM kam u dkhot
- U Dr. W. Kharlukhi, NPP kam u dkhot
- U Renikton Lyngdoh Tongkhar, UDP kam u dkhot
- U Ardent M. Basaiawmoit, VPP kam u dkhot
- U Chief Secretary, sorkar Meghalaya kam u dkhot
- Commissioner & Secretary/ Secretary, Personnel & A.R. (B) Department kam u Member Secretary
